Deputeti i Vetëvendosjes, Glauk Konjufca, e ka quajtur ndërtimin e termocentralit “Kosova e Re”, si projektin më të kriminalizuar ndonjëherë në Kosovë, raporton Ekonomia Online.

“Projekti më i kriminalizuar i nënshkruar ndonjëherë në Kosovë. Edhe kushtet e nënshkrimit, edhe pasojat afatgjata që ka me i pasë nuk kanë me qenë të përfunduar në një moment siç kanë qenë të përfunduara ta zëmë me autostradën me Shqipërinë.  Konsekuencat që ka me i pasë projekti juaj në 20 vitet e ardhshme nëse llogaritet kostoja më së paku ka me pasë kosto 5 miliardë euro drejtpërdrejt nga xhepi i qytetarëve. Projekti po u kushton qytetarëve 150 milionë euro ende pa filluar”, tha ai duke iu referuar interesit të kredisë.

Ai ka thënë se çmimet për energji do të rriten për 45 deri 85 për qind.

“Nëse e përkthejmë këtë në rritje të çmimit të energjisë elektrike, faturat që kanë për ta paguar qytetarët për energji do rriten për 45 deri në 85 për qind. Nëse gjatë një shpenzimi mesatar familjet paguajnë 50 euro për faturë ato kanë me pagu minimumi 75 euro e maksimumi 100 euro në muaj”, tha ai.

Konjufca tha se për shkak të çmimit të lartë të energjisë do të largohen edhe investitorët potencialë.

“Tjetra shqetësuese është se ju keni fshehë pjesë të kontratës aty”, tha ai.

Ministri Lluka iu përgjigj Konjufcës.

“Transparenca. Besoj jam i pari ministër që një kontratë madhore e kam bërë të hapur në momentin kur është nënshkruar. Sot kur flasim për kosto të projektit hala ne nuk e dimë. Janë ekspertë që janë duke e analizuar. Shumë shpejtë do ta kemi një raportim. Do t’iu mbajmë të informuar. Nëse çmimi është mbi 80 euro, ne tërhiqemi. Përndryshe çmimi ka me qenë më i mirë”, tha Lluka.