Memli Krasniqi nga PDK, në emisionin Frontal të Televizionit 7, ka kritikuar opozitën për refuzimin që po i bëhet diskutimit dhe arritjes së një konsensusi politik për fazën finale të dialogut me Serbinë, shkruan Gazeta Express.

Ai ka komentuar edhe kundërshtimin e partive opozitare që Thaci të drejtojë negociatat me Serbinë.

“Nëse po i frikësohen Presidentit, pse nuk shkojnë bashkë me presidentin në Bruksel”, ka thënë Krasniqi.

Shefi i GP të PDK’së thotë se bisedimet nuk duhet të shënohen vetëm me një njëri, pra Presidentin, prandaj thotë se duhet t’i bashkëngjitën partitë tjera.

“Nuk po mendojmë që vetëm një njëri duhet të udhëheq bisedimet. Edhe presidenti ka thënë se thotë për ekip”.

E pse Thaçi ta udhëheqë dialogun?

Krasniqi thotë se përfaqësuesja e lartë e BE’së, Federica Mogherini, e cila ndërmjetëson në dialogun mes Kosovës me Serbinë, i ka dërguar ftesat direkt presidentit Thaci, në emër të Kosovës.

Lidhur me qëndrimet e partive opozitare, të cilat kanë shprehur mosbesim ndaj presidentit Thacit, Krasniqi thotë se “nuk ka rrezik për marrëveshje të dëmshme sepse marrëveshja do të ratifikohet në Kuvend”.

“Nëse ulën dy palë në tavolinë, asnjëra nuk e përfiton maksimumin për të cilën nisën”, ka thënë tutje shefi i GP të PDK’së.

Krasniqi thotë se partitë politike duhet të lënë anash politikat ditore dhe të bëhen pjesë e dialogut sepse një dialog gjithëpërfshirës, sipas tij, e nxjerrë Kosovën më mirë nga dialogu.