Kryeministri i Kosovës, Albin Kurti dhe ministrja e Energjisë, Artane Rizvanolli, kanë diskutuar mundësitë e mundshme të investimit në sektorët e energjisë dhe infrastrukturës me konglomeratet botërore me bazë në Turqi, Limak Holding dhe Calik Holding.

Qeveria po i jep përparësi të dy sektorëve në një përpjekje për të nxitur ekonominë, tha Zyra e Kryeministrit në një komunikatë për media të enjten.

Sipas njoftimit, presidenti i nderit i Limak Holding, Nihat Ozdemir, dhe kryetari i bordit të Calik Holding, Ahmet Calik, shprehën interesin e tyre për të investuar në këta dy sektorë.

Këto kompani e kanë në shfrytëzim operatorin kosovar të shpërndarjes së energjisë KEDS që nga viti 2012, kur u nënshkrua kontrata e privatizimit prej 26.3 milionë euro me Qeverinë e Kosovës.

Përveç KEDS-it, Calik Holding në mënyrë indirekte zotëron huadhënësin e tretë më të madh në Kosovë për sa i përket aseteve, Bankën Kombetare Tregtare Kosova (BKT Kosova). Limak Holding është menaxhues i Aeroportit të Prishtinës.

Limak Holding angazhohet në sektorët e ndërtimit, turizmit, çimentos, investimeve në infrastrukturë dhe energji, aviacion e ushqim. Ajo operon në 14 vende, sipas raportit të saj të vitit 2022.

Ndërkaq, Calik Holding operon në sektorët e energjisë, ndërtimit, minierave, financave dhe tekstilit në 34 vende që shtrihen në të gjithë Azinë Qendrore, Ballkanin, Lindjen e Mesme dhe Afrikën e Veriut.