Kryeministri Albin Kurti, bashkë me ministren e Arsimit, Arbërie Nagavci, kanë marrë pjesë në vendosjen e gurthemelit të ndërtesës së re të çerdhes në afërsi të shkollës së Gjelbër në Prishtinë, raporton Ekonomia Online.

Kurti më këtë rast ka përmendur investimet në ndërtimin e çerdheve në gjithë Kosovë, duke thënë se po i realizojnë zotimet.

Ai më tej ka sqaruar se çerdhja që do të ndërtohet në Prishtinë do të ketë 1 300 metra katrorë e do të kushtojë mbi 700 mijë euro.

“Javën e kaluar e vendosëm gurthemelin e çerdhes në Gjakovë. Sot do të vazhdojmë punime në Prizren, Suharekë, Skenderaj. Do të jem në Podujevë duke lëvizur drejt zotimeve tona”.

“Çerdhja që po i fillon punimet do të 1 300 metra katror. Përmban 5 dhoma për qëndrim të fëmijëve. Ky investim kap vlerën 743 mijë euro. Përgëzime e urime të gjithëve”.

Ministrja e Arsimit, Arbërie Nagavci, tha se Qeveria ka ndarë buxhet për ndërtimin e çerdheve e shkollave të reja, duke shtuar se po punojnë për gjithëpërfshirjen e fëmijëve në edukimin e hershëm.

“Qeveria jo vetëm që ka ndarë buxhetin, por edhe ka rritur buxhetin për investime në shkolla të reja dhe çerdhe. Nga komuna në komunë e fshati në fshat do të punojmë shumë në arsim”.

“Unë pres që punimet të shkojnë mbarë e mirë. Do të punojmë lidhur me gjithëpërfshirjen e fëmijëve në edukimin e hershëm”.

Kryetari i Komunës së Prishtinës, Përparim Rama, e konsideroi fillimin e punimeve të kësaj çerdheje si shumë të rëndësishme për kryeqytetin, raporton Ekonomia Online.

Sipas tij, vetë, bashkëpunimi i nivelit lokal me nivelin qendror jep fryte.

“Përgjegjësia jonë për ngritjen e kualiteti fillon nga fëmijëria ku i mundësojmë fëmijëve të kenë qasje e të shoqërohen me njëri-tjetrin. Është ndihmë edhe për prindërit. Po krijohen mundësi edhe më të mira”.

“Bashkëpunimi i nivelit lokal me nivelin qendror normalisht jep fryte të mirëfillta. Kemi edhe tri shkolla që planifikojmë t’i ndërtojmë. Vetëm me bashkëpunim mund të bëjmë punë të mëdha”.

Fjala e plotë e Kryeministrit Kurti:

I nderuari Kryetar i Komunës së Prishtinës, Përparim Rama,

E nderuara Ministre e Arsimit, Shkencës, Teknologjisë dhe Inovacionit, znj.Arbërie Nagavci,

Të nderuar deputetë të Republikës, Ardian Gola, Fitore Pacolli, Shqipe Selimi,

Të nderuar të pranishëm,

Motra dhe vëllezër,

Zonja dhe zotërinj,

Të nderuar në veçanti mësimdhënës e nxënës,

Mund të them se në këtë fund të muajit tetor po e mbyllim mbarë e mirë me vendosjen e gurthemelit të çerdhes në Prishtinë, këtu në mes të “Kolovicës” dhe “Kodrës së Trimave” në “Fushën e Pajtimit”.

Mirë se po e gjejmë njëri-tjetrin në këtë ngjarje kaq të vlefshme.

Javën e kaluar e vendosëm gurthemelin e ndërtimit të shkollës në Ponoshec të Gjakovës dhe gurthemelin e çerdhes në Gjakovë. Ndërkaq, para asaj jave, vendosëm gurthemelin për ndërtimin e çerdhes edhe në fshatin Miresh të Gjilanit.

Sot jemi në Prishtinë. Do të vazhdojmë me punime edhe në komuna të tjera, si në Prizren, Suharekë, Obiliq, Skenderaj, Pejë, Ferizaj, Shtime e Malishevë.

Stafi im tashmë më ka njoftuar, që në të radhës do të jem në Podujevë, në Besjanë, nga Anamorava në Dukagjin, nga komuna në komuna të tjera, duke lëvizur drejt realizimit të zotimeve tona.

Kemi bërë buxhetimin për ndërtimin e çerdheve të reja edhe për vitin e ardhshëm, për vitin 2023.

Çerdhja, që po i fillon punimet sot, do të jetë me sipërfaqe 1300 metra katrorë dhe do të akomodojë 120 fëmijë të kryeqytetit.

Është projektuar në dy kate dhe përmban pesë dhoma për qëndrim të fëmijëve, tri dhoma të gjumit për fëmijë, kuzhinën, trapezarinë, dhomën e mjekut, dhomën e psikologut, administratën, si dhe hapësirën teknike.

Ky investim ka vlerën 743 mijë euro.

Arsimin e kemi prioritet e veçanërisht zhvillimin e edukimit të hershëm. Edukimi parashkollor është tejet i rëndësishëm për suksesin e fëmijëve dhe të rinjve në arsimimin e mëtutjeshëm dhe në jetën e tyre sidomos profesionale.

Andaj, investimet si ky sot e tjerat që do të vijnë, janë të nevojshme dhe shumë të mirëpritura për vendin dhe për shoqërinë tonë.

Jam shumë i lumtur, që kësaj lagje të Prishtinës dhe Prishtinës si kryeqytet, po i shtohet një çerdhe e re.

Qytetit tonë i japin jetë e gjallëri njerëzit e saj e veçanërisht vogëlushët tanë.

Përkushtimi dhe angazhimi ynë e i secilit prej nesh duhet të jetë për ta e sidomos për ta.

Mezi po presim që dyert e çerdheve që po ndërtohen, të hapen për më meritorët e që janë fëmijët edhe e tashmja edhe e ardhmja jonë.

Botën e tyre imagjinare për një jetë më të gëzueshme e me më shumë mirëqenie, le ta mundësojmë së bashku.

Përgëzime e urime të gjithëve! Paçi punime të mbara në ndërtimin e çerdhes! Ju faleminderit dhe e gëzofshi!