Ky vend pretendon se nuk ka regjistruar asnjë rast me Covid-19

Prishtinë | 08 Nën 2021 | 15:51 | Nga Ekonomia Online

Një zyrtare e lartë e Organizatës Botërore të Shëndetësisë ka ngritur dyshime në lidhje me pretendimet e Turkmenistanit se nuk ka regjistruar asnjë të infektuar me Covid. Ajo tha për BBC-në se nuk ka gjasa që vendi të mos ketë regjistruar asnjë rast me Covid.

“Është përhapur si një pandemi në të gjithë botën për gati dy vite,” tha Dr Catherine Smallwood. “Nga pikëpamja shkencore, nuk ka gjasa që virusi të mos jetë përhapur në Turkmenistan.”

Turkmenistani është një nga vendet e pakta, mes tyre edhe Koreja e Veriut, që pretendon se nuk kanë regjistruar raste të koronavirusit. Deklarata e Smallwood përfaqëson sfidën e parë publike nga OBSH ndaj pretendimit të Turkmenistanit, raporton abcnews.al

Organizata Botërore e Shëndetësisë mbështetet në të dhënat e ofruara nga qeveritë kombëtare për informacionin e saj mbi statistikat e koronavirusit. Agjencia përsëriti pretendimin se vendi nuk ka regjistruar asnjë rast, duke shkaktuar kritika nga të huajt dhe mediat.

Sipas analistëve, statistikat zyrtare të Turkmenistanit për koronavirusin nuk janë të besueshme. Një arsye ishte “natyra jashtëzakonisht represive, autoritare e qeverisë”, tha Rachel Denber, zëvendësdrejtoreshë e Europës dhe Azisë Qendrore në Human Rights Watch.

Qeveria turkmene “ka një histori të gjatë represioni dhe një histori të gjatë ndëshkimi të njerëzve që zbulojnë të vërtetën,” tha ajo.

Një ekip i OBSH-së vizitoi Turkmenistanin në korrik 2020 – i vetmi mision Covid-19 i lejuar deri më tani. Ka disa gjëra pozitive për vendin – sipas Dr Smallwood – të tilla si maskat për fytyrën dhe mbajtja e distancës. Dhe në fillim të këtij viti, vendi u bë i pari që e bëri të detyrueshëm vaksinimin për të gjithë të rriturit.

Qeveria pret të diskutojë masat shëndetësore kundër Covid-19, tha Dr Smallwood. Megjithatë, disa e kanë vënë në pikëpyetje këtë qasje dhe nëse OBSH mund të ndihmojë për t’iu përgjigjur krizës në mënyrë efektive pa statistika të besueshme, siç është numri i rasteve.

Të ngjashme