Kryesia e Lidhjes Demokratike të Kosovës (LDK) ka vazhduar takimet me strukturat e degëve të LDK-së.

Sot, takimi i radhës ishte në degën e II-të në Prishtinë.

Të pranishëm ishin sekretari i Përgjithshëm i LDK-së, Ismet Beqiri, dhe anëtarët e Kryesisë, Vlora Dumoshi, Avdullah Hoti, Arban Abrashi dhe Fidan Rekaliu.

Temat kryesore të takimit ishin qëndrimi i LDK-së për dialogun, qëndrimi kundër ndryshimit të kufijve të Kosovës në çdo rast kur cënohet sovraniteti i vendit, mbështetja e formimit të Forcave të Armatosura në bashkëpunim me SHBA-të dhe Bashkimin Evropian dhe gatishmëria për zgjedhje të reja.

Ismet Beqiri ka përcjellur porosinë e kryetarit Mustafa me të gjitha qëndrimet e LDK-së në lidhje me temat aktuale që po kalon vendi ynë.

Ai, po ashtu, ka theksuar rëndësinë e ekipit të LDK-së që është formuar për Platformën e Dialogut i cili do të japë korniza të qarta në lidhje me vazhdimin e dialogut dhe nevojën për zgjedhje nacionale.

Avdullah Hoti tha se Kosova si shtet është duke u përballur me sfida shumë të vështira dhe kjo është arsyeja pse kryesia ka vendosur të dalë në degë për të ndarë ide dhe vlerësime se çfarë duhet të bëjmë më tutje se si të dalim nga kjo situatë.

Arban Abrashi ka thënë se përpara do të ecin me përvojat dhe të gjitha idetë e strukturave të LDK-së.

Mustafë Krasniqi, kryetar i Degës së II-të ka shprehur gatishmërinë për mbështetje dhe mobilizim për angazhimet në të ardhmen.

Kryesia e degës së II-të qartë ka shprehur mbështetjen e plotë për qëndrimet e LDK-së, dhe gatishmërinë për zgjedhje pasi që Kosovës më shumë se kurrë i duhen institucione legjitime të zgjedhura me votë të qytetarit në mënyrë që dialogu, mbrojtja e territorit të shtetit, formimi i Forcave të Armatosura dhe çdo vendim tjetër i rëndësishëm të shtyhet para prej këtyre institucioneve.

Të gjithë të pranishmit shprehën pakënaqësinë ndaj qeverisjes aktuale dhe për të gjitha zhvillimet tejet të rëndësishme në Kosovë.

Takime të tilla janë shumë të frytdhënëse pasi që idetë e strukturave do të jenë shumë të rëndësishme në krijimin e platformës zgjedhore dhe në qeverisjen në të ardhmen.