Lumezi cakton një prokuror për gazetarë

Prishtinë | 08 Mar 2017 | 12:19 | Nga

Kryeprokurori i shtetit Aleksandër Lumezi ka pritur sot në takim kryetarin e  Asociacionit të Gazetarëve të Kosovës, Shkëlqim Hysenaj dhe hulumtuesin nga ky Asociacion, Petrit Qollaku. Qëllimi i këtij takimi ishte mundësia e rritjes së bashkëpunimit në mes Prokurorit të Shtetit dhe Asociacionit të Gazetarëve të Kosovës, me ç’rast kryeprokurori Lumezi ka bërë të ditur një vendim, i cili pritet të hyjë në fuqi së shpejti, me të cilin ka caktuar një prokuror nga Zyra e tij koordinator për rastet e kanosjeve apo veprave tjera penale që kryhen ndaj gazetarëve në lidhje me punën e tyre si gazetarë.

Poashtu me këtë vendim do të obligohen kryeprokurorët e  Prokurorive Themelore që të caktojnë nga një prokuror, të cilët do të merren edhe me rastet e raportuara ku gazetarët paraqiten si të dëmtuar.

Në takim është biseduar edhe për sigurinë e gazetarëve, mbrojtjen e tyre dhe për ndjekjen penale në kohë në të gjitha rastet ku janë të përfshirë gazetarët, duke përfshirë edhe zbardhjen e rasteve të gazetarëve të vrarë dhe të zhdukur.

Kryeprokurori Lumezi ka informuar se prokurorët do t’i trajtojnë rastet e tilla me prioritet dhe prokurorin e ngarkuar si koordinator do ta mbajnë të informuar për të gjitha veprimet e marra në procedurë, duke nënkuptuar ngritjen e aktakuzës, pushimin e hetimeve apo hedhjen e kallëzimit penal apo ndonjë veprim tjetër eventual, si dhe për aktgjykimet e marra nga ana e gjykatave.

Kryeprokurori Lumezi gjithashtu informoi se prokurori i caktuar si koordinator do të mbajë një databazë të posaçme në lidhje me këto raste dhe me vendim obligohet që në baza të rregullta mujore të informojë kryeprokurorin e Shtetit për të gjitha veprimet e ndërmarra  në këtë drejtim.

Në fund të takimit kryeprokurori Lumezi siguroi të pranishmit se edhe në të ardhmen për aq sa lejohet me legjislacionin në fuqi Prokurori i Shtetit do të bashkëpunoj me të gjithë gazetarët, pa i ndarë ata se nga cili medium vijnë, si dhe do të bëjë përpjekje të ndërtoj dhe të ruaj raporte të mira bashkëpunimi me gazetarët e të gjitha mediave në vend.

Fjalë Kryesore:

Të ngjashme