Presidenti francez Emmanuel Macron ka futur në fuqi ligjin e diskutueshëm të reformës së pensioneve që rrit moshën e pensionit për dy vjet, pavarësisht protestave masive kundër tij.

Teksti i projektligjit u publikua sot në gazetën zyrtare të Francës, duke e kthyer atë në ligj që rrit moshën e daljes në pension nga 62 në 64.

Sistemi i pensionit i vendit është ndër më bujarët në botën e industrializuar. Mosha e daljes në pension në shumicën e vendeve të tjera evropiane është 65 vjeç.

Këshilli Kushtetues prej nëntë anëtarësh të premten e mbështeti tekstin, duke konkluduar se rritja e moshës së pensionit nga qeveria ishte në përputhje me kushtetutën.

Në anën tjetër, Këshilli rrëzoi masat e mëtejshme që nuk i konsideroi thelbësore për reformën, si propozimi për një referendum mbi çështjen e moshës, i paraqitur nga kundërshtarët e Macronit, shkruan DW, transmeton Klankosova.tv.

Franca është tronditur nga grevat e përgjithshme dhe ka parë qytetarë të përfshirë në përleshje në rrugë me policinë, pasi shumë aspekte të jetës së përditshme vazhdojnë të preken nga protestat dhe grevat.

Sindikatat kanë bërë thirrje për protesta mbarëkombëtare për 1 Maj, Ditën Ndërkombëtare të Punëtorëve.