Mbretëria e Bashkuar e ka mbështetur vendimin e Shteteve të Bashkuara të Amerikës për të vendosur sanksione ndaj anëtarit serb të Presidencës së Bosnjë e Hercegovinës, Millorad Dodik, ndërsa vijnë thirrje që vendet e Bashkimit Evropian të bashkohen në ndëshkimin e politikanit, të cilin Washingtoni e ka identifikuar si kërcënim të drejtpërdrejtë për paqen dhe stabilitetin në Bosnjë.

Sekretarja e Jashtme britanike, Elizabeth Truss e përshëndeti vendimin në llogarinë e saj në Twitter, duke mbështetur deklaratën e Sekretarit amerikan të Shtetit, Antony Blinken, i cili konfirmoi sanksionimin e Dodikut për “vepra korruptive dhe destabilizuese”.

“Korrupsioni është kërcënim për lirinë, demokracinë dhe paqen në Bosnjë e Hercegovinë. Mbretëria e Bashkuar mirëpret sanksionet e shënjestruara nga Shtetet e Bashkuara të Amerikës sot, të cilat i mbajnë përgjegjësit në llogari”, shkroi Truss. “Ne vazhdojmë të punojmë me aleatët për të mbështetur Bosnjë e Hercegovinën dhe kauzën e lirisë në rajon.”

Corruption is a threat to freedom, democracy and peace in Bosnia and Herzegovina.

🇬🇧 welcomes targeted sanctions from the 🇺🇸 today which hold those responsible to account.

We continue to work with allies to support 🇧🇦 and the cause of liberty in the region. https://t.co/HnAtyVbfwP

— Liz Truss (@trussliz) January 6, 2022

Ministrja e Jashtme gjermane, Annalena Baerbock ishte shprehur hapur pro vendosjes së sanksioneve ndaj Dodikut. Në dhjetor, ajo pati thënë se sanksionet duhet të përdoren kundër Dodikut.

Departamenti amerikan i Thesarit njoftoi të mërkurën për zgjerimin e sanksioneve për vepra korruptive, në të cilat është përfshirë anëtari serb i Presidencës së Bosnjë e Hercegovinës, Millorad Dodik. Siç thuhet në njofim, sanksionet janë vendosur edhe ndaj televizionit ‘Alternativa’ nga Banja Lluka, që ndërlidhet me Dodikun.

Sanksionet e reja përfshijnë bllokimin e aseteve dhe llogarive bankare.

“Si rezultat i aksionit të sotëm, të gjitha pronat dhe interesat në pronë të të sanksionuarve të listuar më sipër që ndodhen në SHBA ose apo kontrollohen nga një shtetas amerikan janë bllokuar dhe duhet të raportohen në OFAC (Zyra e Departamentit amerikan të Thesarit për Kontrollin e Pasurive të Huaja)”, thuhet në njoftimin e Departamentit amerikan të Thesarit.

Gjithashtu u theksua se sanksionet përfshijnë lloje të tjera ndalimesh.

“Të gjitha transaksionet e kryera nga qytetarët e SHBA-së, ose brenda Shteteve të Bashkuara (ose në tranzit përmes Shteteve të Bashkuara) që përfshijnë çdo pronë ose të drejtë pronësie të personave të listuar ose të sanksionuar ndryshe janë përgjithësisht të ndaluara, përveç rastit kur OFAC ka lëshuar një leje ose përjashtim të përgjithshëm ose specifik. Ndalimet zbatohen për kontributin ose dhënien e fondeve, mallrave ose shërbimeve nga, për ose në dobi të çdo personi të sanksionuar, ose marrjen e ndonjë kontributi ose fondi, mallrash ose shërbimesh nga një person i tillë”, thuhet në njoftim.

Dodik e cilësoi vendimin si “të pakuptimtë”, ndërsa qahej për sanksionet e reja ndaj tij.

“Ndoshta gjëja e parë që ju bie në sy është koha e shpalljes së këtij vendimi, pra në prag të festës më të gëzuar të të Krishtlindjes. Historikisht ne si komb jemi sulmuar në festa të mëdha dhe e di që ata që qëndrojnë pas këtij vendimi e dinë. Gjëja e dytë që më vjen në mendje është se një vend që krenohet me të drejtat e njeriut dhe lirinë e medias ka sanksionuar median”, tha Dodik pak minuta pas publikimit të vendimit.

Përveç Dodikut, SHBA-ja ndërmori sanksione edhe kundër ish-kryetarit të Këshillit të Lartë Gjyqësor dhe Prokurorial të Bosnjë e Hercegovinës dhe kryetari i Lëvizjes për Veprim Demokratik, Milan Tegeltija dhe Përfaqësuesit të Asamblesë Parlamentare të Republika Srpskas, Mirsad Kukiq. Të dy u futën në listën e zezë për shkak të përfshirjes së tyre në korrupsion.

Së fundmi, Dodik kërcënoi hapur se do ta ndalojë punën e organeve gjyqësore shtetërore në territorin e Republika Srpskas dhe se ligjet e RS do të miratohen brenda një muaji, gjë që do t’i konfirmonte përpjekjet e para konkrete të tij për shkëputjen nga Bosnja.

Pozicionin e tij e konfirmoi edhe pas sanksioneve të shpallura.

“Nëse Bosnja shpërbëhet dhe padyshim që do të shpërbëhet, Republika Srpska është e vetmja që mund të funksionojë”, tha Dodik pas një seance të bordit ekzekutiv të partisë së tij.