MI ndalon qarkullimin e veturave në rrugën Kaçanik – Hani i Elezit

Prishtinë | 07 Maj 2018 | 18:24 | Nga Shkarko Videon HD

Për ta shkarkuar videon ju lutem kyçuni ose regjistroni një llogari të re!

| Regjistrohu

Ministria e Infrastrukturës (MI) ka marrë vendim që nga nesër, ora 10:00, të ndalohet qarkullimi i veturave në rrugën nacionale N2, Kaçanik – Hani i Elezit, pasi ka rrezik nga rrëshqitja e dheut dhe gurëve.

Zëvendësministri i Infrastrukturës, Rexhep Kadriu, në konferencën e jashtëzakonshme për medie, ka dhënë detaje se cilat veprime do të ndërmerren në vijim sa i përket kësaj rruge.

Kadriu ka thënë se në ditët në vijim do të bëhen matje të vazhdueshme nga ekspertët, në mënyrë që të dihet saktë se sa është lëvizja e terrenit në këtë segment rrugor, që të mund të merren masat e duhura në sanim të dëmit dhe për sigurinë e qytetarëve.

Kadriu duke folur për alternativat e ofruara për qytetarët ka dhënë detaje se cilat rrugë do të mund të shfrytëzohen për qarkullim me vetura dhe cilat për kamionë.

“Qytetarët me vetura të kalojnë në aksin rrugor Glloboqicë – Hani i Elezit  ose ta shfrytëzojnë mbikalimin në Glloboqicë”.

“Për herë të parë MI merr masa preventive për ruajtjen e sigurisë së qytetarëve. Ne po marrim masa që të mos na ndodh një situatë që të ketë pasoja fatale për pjesëmarrësit në komunikacion. Brenda 10 dite planifikojmë të dimë gjendjen e saktë dhe të dalim me një projekt sanues për atë vend”, tha zëvendëskryeministri Kadriu.

“Gjatë punës tonë në terren gjatë këtyre ditëve kemi hasur në një pjesë të kodrës  e cila bie në rrugën N 2, segmenti Kaçanik – Hani i Elezit dhe jemi njoftuar edhe  nga  mbikëqyrësi i Rajonit të Ferizajt se ka lëvizje të asaj pjese, me ç’rast bashkë me drejtorin e mbikëqyrjes së projekteve  kemi konstatuar gjendjen që në ditën e premte dhe kemi parë se situata është jashtëzakonisht serioze në atë pjesë. Mbrëmë me fillimin e reshjeve atmosferike, në atë segment plasaritja veçse është zgjeruar për disa centimetra, kështu që ne sot bashkë me të gjithë drejtorët i kemi rekomanduar ministrit Pal Lekaj, që të merret vendim për ndërprerjen e qarkullimit të veturave në aksin rrugor Kaçanik- Hani i Elezit. Ky vendim hyn në fuqi nesër në ora 10:00 dhe do të vazhdojë deri në sanimin e gjendjes”.

“Masat që duhet të merren në këtë segment janë sinjalistika e cila duhet bërë për orientim të qytetarëve se nga të lëvizin, largimi i gab​ioneve të gurëve e që janë jashtëzakonisht problematik, sepse po e rëndojnë brezin e rrugës, shqyrtimet gjeo-mekanike që duhen bërë qysh nga nesër, matjet e lëvizjes së tokës përgjatë një jave rresht, sepse duam ta shohim se sa kemi lëvizje të asaj pjese brenda ditës dhe brenda orëve dhe në fund do ta kemi një propozim të daljes nga kjo gjendje e cila është momentalisht. Ne si alternativë kemi paraparë që veturat të kalojnë në aksin rrugor Glloboçicë – Gorancë – Hani i Elezit, rrugë e cila ka një gjatësi prej 12 kilometrash dhe e cila vitin e kaluar nga Ministria e Infrastrukturës është asfaltuar dhe ka një gjerësi prej 6 metrash, ndërsa nga Fusha e Pajtimit,  i bije diku rreth 24 kilometra, ku qytetarët mund ta shfrytëzojnë për në drejtim të Shkupit. Alternativa tjetër është edhe pikëkalimi në Glloboçicë, i cili shkon në drejtim të Tetovës. Kurse të gjithë kamionët duhet të kalojnë në Glloboçicë që nga dita e nesërme”.

“Të gjitha këto veprime të ndërmarra sot, janë vendim i vështirë për ministrinë, sepse do të kemi vështirësi të madhe në qarkullim për qytetarët, mirëpo kjo po bëhet për herë të parë si masë preventive nga Ministria e Infrastrukturës për sigurinë e qytetarëve para se shembja të ndodhë,  sepse atëherë do të rrezikohej qytetari, prandaj ne kemi marrë masat qysh tash që të mos vije deri tek një situatë e cila do të mund të ishte me pasoja edhe fatale për pjesëmarrësit në komunikacion. Ne brenda 10 dite planifikojmë ta dimë saktë se si duhet vepruar dhe do të dalim me një projekt për sanimin gjendjes, qoftë me ndërtim të një ure, apo riasfaltim të asaj pjese, por kjo do të varet nga vendimi pas matjeve të ekspertëve mbi bazën e vlerësimit të situatës”, tha zëvendësministri Kadriu.

Të ngjashme