Ministri i Forcës së Sigurisë së Kosovës, Haki Demolli ka pritur sot në takim ambasadorin e Malit të Zi në Kosovë, Ferhat Dinosha.

Gjatë takimit, ministri Demolli duke i uruar detyrën e re diplomatit nga Mali i Zi,  e njoftoi edhe me  misionin, detyrat dhe aktivitetet e Ministrisë dhe të Forcës së Sigurisë; për zhvillimet në MFSK dhe FSK, si dhe për bashkëpunimin e suksesshëm ndërkombëtar të MFSK dhe FSK me partnerët strategjikë në rajon dhe më gjerë.

Sipas një komunikate për medie, ministri Demolli u shpreh se marrëdhëniet e mira fqinjësore ndërmjet Kosovës dhe Malit të Zi, përkatësisht Ministrisë për FSK dhe Ministrisë së Mbrojtjes duhet të vazhdojnë të kultivohen edhe më tutje, si marrëdhënie ndërmjet dy shteteve dhe institucioneve që aspirojnë integrimin në Bashkimin Evropian dhe anëtarësimin në NATO.

Po ashtu ministri, Demolli foli edhe lidhur me procesin e transformimit të FSK-së në Forca të Armatosura, për synimet e Kosovës për anëtarësim në NATO, Bashkim Evropian, si dhe në iniciativat rajonale, evropiane dhe globale.

Duke ditur që Mali i Zi është pothuajse një hap përpara, ministri i FSK-së, Haki Demolli  anëtarësimin e pritur të Malit të Zi në NATO e cilësoj si një sukses edhe të rajonit në përgjithësi.

Nga ana e tij, ambasadori i Malit të Zi në Kosovë, Ferhat Dinosha shprehu përkrahjen e pa rezerve për Kosovën në rrugën e saj evropiane, si dhe u shpreh se marrëdhënie e mira në mes të Malit të Zi dhe Kosovës do të vazhdojnë edhe në të ardhmen, duke qenë se paqja dhe prosperitetit i shtetit të Kosovës është edhe në interes të rajonit në përgjithësi./EkonomiaOnline/