Ministrja e Integrimit Evropian, Dhurata Hoxha, ka ftuar bashkëkombësit dhe qytetarët e Maqedonisë të dalin në Referendum dhe të votojnë, t’i thonë Po jo vetëm emrit, por edhe Bashkimit Evropian dhe NATO-s, sepse “edhe Bashkimi Evropian, edhe NATO-ja, ishin, janë dhe mbesin krahu më i fuqishëm i sigurisë së pavarësisë tonë, të drejtave të njeriut, demokracisë dhe zhvillimit ekonomik”.

Postimi i plotë i ministres Hoxha në rrjetin social Facebook:

“Qytetarë të Republikës së Maqedonisë,

Të dielën, është Ditë e madhe e historisë, për Maqedoninë dhe Ballkanin në tërësi.

Nëpërmjet Referendumit, këtij mekanizmi më demokratik që njeh njerëzimi, do t’i jepet fund dilemave, jo vetëm për emrin, por edhe për përkatësinë brenda strategjive globale, Bashkim Evropian apo diku tjetër, NATO apo diku tjetër.

Të nderuar qytetarë të Maqedonisë,

Këtë dilemë, e kemi hequr si shumicë e shteteve të Ballkanit, sepse, në të dyja rastet, edhe Bashkimi Evropian, edhe NATO-ja, ishin, janë dhe mbesin krahu më i fuqishëm i sigurisë së pavarësisë tonë, të drejtave të njeriut, demokracisë dhe zhvillimit ekonomik.

Gjithsesi, si Ministre, ftoj bashkëkombësit, të gjithë qytetarët e Maqedonisë, pa dallim etnie, feje apo përkatësie politike, ta thonë fjalën e vet, Po-Bashkim Evropian, Po-NATO. Unë, përkrah fuqishëm këtë rrugë jo vetëm të Maqedonisë, por të gjithë Ballkanit, si hapësirën më të dinjitetshme, më të sigurt dhe më demokratike që mund të zgjedhim, integrimin me vlerat euro-atlantike.

Rajoni i Ballkanit, është zonë e ndikimit të fuqishëm të Bashkimit Evropian, andaj, si tërësi, do të integrohet brenda vlerave euro-atlantike. Orientimet e vendeve të veçanta, edhe mund të duken me opozitarizëm, por, drejtimi themelor, është pa alternativë, integrimi në Bashkimin Evropian dhe NATO.

Qytetarë të Maqedonisë, votoni, për të tashmen dhe të ardhmen Tuaj dhe fëmijëve Tuaj! Ju këtë duhet ta bëni, për veten Tuaj, të drejtat Tuaja, për vlerat më të çmuara njerëzore e politike!

Suksese!”