Lojtari më i mirë i Real Madridit në tre muajt e fundit është 35-vjeçar dhe në verë i skadon kontrata me klubin nga La Liga. Kroati Luka Modriq ka qenë ndoshta lojtari më i mirë i Real Madridit këtë sezon, si dhe është votuar lojtari i muajit nga tifozët e klubit për nëntor, dhjetor dhe janar. Ai me meritë mund të fitonte edhe në muajin shkurt këtë çmim. Askush në skuadrën e trajnerit Zinedine Zidane nuk është më i vjetër se Modriqi dhe vetëm katër kanë më shumë minuta se mesfushori kroat në edicionin 2020/21. Njëri prej tyre është portieri Thibaut Courtois.

Modriq është golashënuesi i tretë më i mirë në klub dhe i pesti për asistime, edhe pse kontributi i tij nuk reflektohet kurrë me të vërtetë nga këto matje. Nëse për shembull Modriq krahasohet me Frenkie de Jongun e Barcelonës, që luan në të njëjtin rol, është 12 vjet më i ri dhe po kalon një sezon të shkëlqyeshëm, sërish kroati veteran del më mirë. Modriqi ka dribluar më shumë se De Jongu, është fauluar më shumë, është sfiduar më shumë, ka pasur më shumë goditje, ka bllokuar më shumë goditje dhe ka shënuar të njëjtin numër të golave.

“Unë kam të njëjtën dëshirë për të luajtur dhe për të konkurruar për vendin tim në ekip. Me të vërtetë dua të tregoj se mosha ime nuk është problem”, ka pranuar Modriq. “Ajo që është e rëndësishme është se si luani në fushë dhe shpresoj se unë mund të qëndroj në këtë nivel për shumë vite të tjera”.

Kontrata e Modriqit me Real Madridin skadon në fund të muajit qershor. Ndërsa raportet e gazetave në dhjetor pretendonin se një marrëveshje njëvjeçare ishte arritur mes palëve, dy muaj më vonë ende asgjë nuk është zyrtare. Ndoshta ka më shumë negociata për t’u bërë mes palëve, veçanërisht nga Real Madridi, ku gjendja financiare e klubit nënkupton që çdo euro duhet të kursehet si pasojë e goditjes së rëndë nga përhapja e pandemisë së koronavirusit.

“Do të ishte fantastike të përfundoja karrierën time në këtë klub fantastik dhe në këtë qytet fantastik”, pati thënë Modriqi më herët. “Por, nuk është vendimi im. Varet nga Real Madridi dhe mund të them se ky do të jetë ekskluzivisht vendim i klubit”.

Nëse kontrata e Modriqit do të lejohet të skadojë, nuk do të ketë mungesë të ekipeve të interesuara, përfshirë disa nga më të mëdhatë dhe më të mirat në Evropë.

Në një situatë si të Modriqit është edhe kapiteni i Realit, Sergio Ramos. Siç është zbuluar ditëve të fundit, Reali po ngurron për t’i rinovuar kontratat e futbollistëve që do të skadojnë në fund të këtij edicioni dhe në mesin e tyre është e Modriqit. Ky ngurrim nuk ka të bëjë vetëm me kursimin e parave, por me mesazhin se klubi synon të hyjë në një epokë të re. Pra, klubi nuk dëshiron të varet më nga ikonat e fundit dhe po planifikon një reformim. Modriqi është pjesë e Realit prej verës së vitit 2012, kur iu bashkua nga skuadra e Tottenhamit.

“Në klub ka hezitime për t’i rinovuar kontratat me gardën e vjetër”, ka shkruar “Marca”.

Mirëpo, çfarë ndodh kur lojtarët e vjetër janë akoma më të mirë sesa të rinjtë? Kur lojtari më i vjetër është, në fakt, padyshim më i miri? Dhe, këtu bëhet fjalë pikërisht për Modriqin. Dëshmia më e freskët është ajo e sulmuesit Luis Suarez. Uruguaiani u dëbua nga Barcelona verën e kaluar, jo për shkak të paraqitjeve të dobëta – ai shënoi 21 gola sezonin e kaluar – por sepse klubi donte të niste një cikël të ri. Suarez tani është golashënuesi më i mirë i La Ligas dhe forca lëvizëse e Atletico Madridit, ekip që është në krye të tabelës me gjashtë pikë më shumë se Real Madridi.

Besnikëria e trajnerit Zinedine Zidane ndaj një grupi të zgjedhur të futbollistëve e ndihmoi atë të fitonte tre trofe të Ligës së Kampionëve rresht, por në muajt e fundit presioni është rritur mbi francezin. Kur rezultatet ishin të dobëta, një kritikë ka qenë refuzimi i tij për ta përqafuar të ardhmen.

“Vitin tjetër ata do të duhet të bëjnë gjëra, të bëjnë ndryshime ndoshta”, pranoi Zidane. “Por, këtë vit ne kemi të drejtë të luftojmë dhe do ta bëjmë një gjë të tillë. Nuk do të dorëzohemi”.

Modriqi ka qenë lojtari i dalluar në një treshe të mesfushës që mund të jetë akoma më e ekuilibruar në Evropë. As Toni Kroos dhe as braziliani Casemiro nuk duken sikur kanë nevojë për zëvendësim. Federico Valverde për pak kohë u fut, por është zbehur. Isco është përjashtuar. Martin Odegaard u rikthye te Reali para fillimit të këtij edicioni dhe shihej si lojtari i brezit të ri në klub. Megjithatë, muajin e shkuar, ai u huazua tek Arsenali deri në fund të edicionit. Ndërsa Odegaard qëndronte në stol te Reali, ai e pa Modriqin ende duke orkestruar, duke vrapuar në çdo cep të fushës dhe duke shpërndarë topa për bashkëlojtarët. Ai e pa Modriqin duke drejtuar këtë ekip të Real Madridit pavarësisht moshës së tij dhe këtë po e sheh gjithashtu edhe trajneri Zidane. Edhe në këtë sezon të ngarkuar me ndeshje, Modriqi ka qenë titullar në 20 prej 23 ndeshjeve të Realit në kampionat, një kthim prapa në të kaluarën, duke shkëlqyer në të tashmen.

“Ai është i jashtëzakonshëm dhe motori i ekipit”, pranoi Zidane.

Real Madridi luan të shtunën në udhëtim te Real Valladolidi, me shpresën për ta zvogëluar hendekun e pikëve të krijuar nga Atletico Madridi që e pret në shtëpi Levanten. Ndërsa Barcelona, që është ​​në vendin e tretë, luan të dielën në “Camp Nou” kundër Cadizit.