Ministria e Punëve të Brendshme ka mbajtur takimin i radhës i grupit për implementimin e strategjisë për narkotikë.

Në këtë takim u diskutua lidhur me raportet e tremujorit të tretë të këtij viti, për  të gjitha institucionet të cilat janë të përfshira në përmbushjen e objektiveve e përgjithshme të Strategjisë kundër Narkotikëve.

Zëvendësministri i Punëve të Brendshme, njëherit Koordinator Nacional në luftën kundër Narkotikëve, Nehat Mustafa, vlerësoi se gjatë kësaj periudhe janë mbajtur disa takime të rëndësishme si jashtë vendit dhe brenda me qëllim të bashkimit të sa më shumë aktorëve për një luftë sa më efikase të ndaj parandalimit të trafikimit të narkotikëve.

“Të gjitha institucionet publike dhe jopublike duhet të jenë të kujdesshme në  prezantimin e shifrave të përdoruesve të lëndëve narkotike. Zyra e Koordinatorit Nacional nuk qëndron prapa shifrave të prezantuara në dokumentin SOCTA. Zyra e Koordinatorit Nacional nuk është konsultuar asnjëherë për shifrat e prezantuara dhe si të tilla për ne janë të papranueshme dhe të pasakta. Aq më keq këto shifra janë në kundërshtim edhe me vet raportet e DHTN”, theksoi zëvendësministri Mustafa.

Si objektiva të rëndësishme të aktiviteteve për periudhën e ardhshme mbetën: Organizimi i  një konference ndërkombëtare kundër narkotikëve; hartimi i një projekti të përbashkët për parandalimin e përdorimit të narkotikëve; intensifikimi i bashkëpunimit me organizatat e ndryshme ndërkombëtare, si EMCDDA etj dhe zgjerimi i qendrave që ofrojnë shërbime trajnimi për viktimat e përdorimit të narkotikëve.

Në fund u vendos që të hartohet një projekt hulumtues, me pjesëmarrjen e ekspertëve  vendor të të gjitha fushave, përmes së cilit do të synohet të kemi një shifër sa më të përafërt të numrit të përdoruesve të substancave narkotike.