Me rastin e Kërshëndellave, Myftiu i Kosovës, Naim ef. Tërnava, i ka dërguar Ipeshkvit të Kosovës, Dodë Gjergjit, telegram urim, shkruan Ekonomia Online.

“Festat fetare te ne gjithherë kanë qenë momente që na kanë
bashkuar në të mirë, nga to kemi mësuar e kultivuar tolerancën, harmoninë, ndërgjegjësimin për paqen, respektin dhe dashurinë për tjetrin”, ka shkruar Tërnava.

Telegrami i plotë i Tërnavës drejtuar ipeshkvit Dodë Gjergjit:

Sot, me rastin e festës së Kërshëndellave, kam nderin e veçantë t’ju  drejtohem me këtë mesazh urimi e përgëzimi Juve,  meshtarëve tuaj, si dhe  të gjithë vëllezërve të krishterë duke ju dëshiruar shëndet, mbarësi e lumturi.

Kërshëndella është moment i veçantë që simbolizon e përkujton lindjen, jetën e mbarësinë. Po ashtu kjo festë  përçon në mënyrën më të mirë mesazhin për ndërtimin e shoqërisë së shëndoshë e humane.

Zotni Ipeshkëv, festat fetare te ne gjithherë kanë qenë momente që na kanë
bashkuar në të mirë, nga to kemi mësuar e kultivuar tolerancën, harmoninë, ndërgjegjësimin për paqen, respektin dhe dashurinë për tjetrin.
Zotni Ipeshkëv, nëpërmjet jush, uroj e përgëzoj edhe të gjithë praninë
ndërkombëtare katolike në Kosovë.

Duke ju përshëndetur, Ju dëshiroj shëndet, mbarësi e lumturi.