Një person ka gjetur vdekjen dhe një tjetër ka mbetur i lënduar rëndë.

Ky është bilanci i një përleshje, edhe me thika, në Lipjan.

Kjo është konfirmuar edhe nga Policia e Kosovës, përkatësisht zëdhënësja e Policisë, Flora Ahmet.

Ajo kishte thënë të shtunën se “Sot rreth orës 15:00 policia ka marrë informatën për një rrahje në rrugën ‘Lidhja e Prizrenit’, në Lipjan”.

“Menjëherë në vendin e ngjarjes kanë dalë njësitet e nevojshme policore. Bazuar në të dhënat fillestare të hetimit, si pasojë e përdorimit të mjeteve të forta dhe një arme të ftohtë (thike), gjatë përleshjes, lëndime të rënda trupore kanë pësuar dy persona”, ka thënë Ahmeti për Telegrafin.

Sipas saj, të njëjtit janë dërguar për tretman mjekësor në QKUK, por që njeri nga personat e lënduar ka ndërruar jetë.

Lidhur me këtë, Ahmeti ka theksuar se hetuesit policor janë duke punuar për sqarimin e të gjitha rrethanave që kanë të bëjnë me këtë rast.

Ndërkohë, siç raportojnë mediat, kjo përleshje ka ndodhur mes familjarëve, ku njëri prej tyre ka vdekur.

Prokurori Ilaz Beqiri për Indeksonline ka thënë se lidhur me këtë rast janë ndaluar dy persona.

“Prokuroria ka qenë në vend të ngjarjes dhe ka ndaluar dy persona deri tani lidhur me rastin. Po ashtu, kemi lëshuar urdhëresë për autopsinë e trupit të ndjerit”, ka thënë Beqiri.

Ai ka shtuar se dyshimet e para për përleshjen është se ka ndodhur për motive pronësore, përkatësisht mes familjarëve dajë e nipa.

Beqiri ka shtuar tutje se ata kanë qenë komshinj dhe se vetëm një muri i ka ndarë.

Ndryshe, për motive të tilla pronësore, para dy dite, në Prishtinë, dy persona kanë vdekur, ndërsa dy të tjerë janë në gjendje të rëndë shëndetësore.