Papa Françesku e nisi vitin e ri të shtunën duke lavdëruar aftësitë që gratë sjellin për të promovuar paqen në botë dhe ai e barazoi dhunën ndaj grave me një ofendim kundër Zotit.

Kisha Katolike Romake shënon 1 janarin si një ditë kushtuar paqes botërore dhe një meshë vonë në mëngjes në Bazilikën e Shën Pjetrit të qytetit të Vatikanit i bëri homazhe vendit të veçantë të Virgjëreshës Mari në besim si nëna e Jezusit.

“Nënat dinë të kapërcejnë pengesat dhe mosmarrëveshjet dhe të rrënjosin paqen”, tha Françesku gjatë predikimit të tij.

“Në këtë mënyrë, ato i shndërrojnë problemet në mundësi për rilindje dhe rritje. Ato mund ta bëjnë këtë sepse dinë të ‘mbajnë’, të mbajnë së bashku fijet e ndryshme të jetës. Ne kemi nevojë për njerëz të tillë, të aftë për të thurur fijet e bashkimit në vend të telit me gjemba të konfliktit dhe ndarjes”, tha ai.

Françesku u bëri thirrje të gjithëve që të shtojnë përpjekjet për të promovuar nënat dhe për të mbrojtur gratë, shkruan AP.

“Sa dhunë ushtrohet ndaj grave! Mjaft! Të lëndosh një grua do të thotë të fyesh zotin, i cili nga një grua mori njerëzimin tonë”, tha Papa, duke iu referuar besimit të krishterë se Jezusi ishte biri i Zotit.

Ai shpërndau lavdërime për gratë, duke përfshirë edhe nënat, duke thënë se ato e shikojnë botën jo për ta shfrytëzuar atë, por që ajo të ketë jetë.

Ndërsa u zotua në papatin e tij për t’u dhënë grave role më të mëdha në kishë, Françesku e ka bërë gjithashtu të qartë se priftëria është e rezervuar për burrat.