Aktivistja 29-vjeçare dhe pedagogia e ekonomisë Frozan Safi u qëllua për vdekje në Afganistan. Ajo është mbrojtësja e parë e të drejtave të grave, që vritet që kur talebanët u kthyen në pushtet rreth 3 muaj më parë.

Ajo ishte zhdukur prej rreth dy javësh, më 20 tetor, ndërsa trupi i saj u identifikua në një morg në qytetin Mazar-i-Sharif.

“E kemi njohur nga rrobat. Plumbat ia kanë shkatërruar fytyrën”, tha motra e saj, e cila është mjeke.

“Kishte plagë plumbash gjithandej, në kokë, zemër, gjoks, veshka dhe këmbë”, tha ajo, raporton The Guardian.

Të enjten, forcat e sigurisë talebane sollën trupat e dy grave të paidentifikuara që ishin qëlluar për vdekje në spitalin provincial të Balkh. Ato ishin gjetur së bashku me trupat e dy burrave në një shtëpi në Mazar-i-Sharif, tha Zabihullah Noorani, drejtor i talebanëve për çështjet e informacionit dhe kulturës në provincën Balkh, i cili sugjeroi se ato mund të kishin qenë viktima të një “marrëveshjeje personale”.