Vjosa Osmani, ish-deputete e LDK-së, ka publikuar në faqen e saj në Facebook një poezi të rilindasit Luigj Gurakuqi, e cila duket të jetë përgjigje ndaj përjashtimit nga lista zgjedhore e LDK-së .
“Veç nji qëllim i naltë t’ban me durue…” thotë poezia e njohur e Gurakuqit, një aludim ky i qartë që ajo nuk është e kënaqur me zhvillimet në LDK.
Osmani kishte qenë femra më e votuar e kësaj partie në zgjedhjet e fundit.
Mediet kanë raportuar se LDK-ja pritet ta përjashtojë nga lista për deputetë Osmani dhe katër ish-deputetë nga radhët e kësaj partie të cilët nuk e kishin votuar Mustafën si kryeministër. Në mesin e tyre është dhe Shpejtim Bulliqi, njeriu më i zëshëm kundër marrëveshjes së demarkacionit.
Aktualisht, Këshilli i Përgjithshëm po mban mbledhjen ku pritet të përcaktojë listën e kandidatëve për deputetë të kësaj partie.
Një zyrtar i LDK-së tha për Ekonomia Online se Osmani, megjithatë, do të përfshihet në listë.
Më herët, kryetari i nderit i Lidhjes Demokratike, Fatmir Sejdiu, e lëshoi demonstrativisht mbledhjen e Këshillit të Përgjithshëm të partisë. Ai akuzoi kryetarin Isa Mustafa se po vendos gjithçka vetë.