Mbetja pa birra thjesht nuk është opsion për pronarët e bareve në Stamboll, ku Chelsea dhe Liverpooli do të përballen në ndeshjen për Superkupë të Evropës të mërkurën.

Është hera e parë që dy skuadra angleze përballen për Superkupën e UEFA-s. Derisa autoritetet e Stambollit kanë implementuar masa të rrepta të sigurisë dhe kontrollimit të turmës, pronarët e bareve kanë bërë përgatitjet e veta me kujdes, transmeton Koha Ditore shkrimin e CNN.

“Ne kemi siguruar sasi të madhe të birrës. Sigurisht se jemi të lumtur për këtë”, ka thënë Dogan Ozdemir 40-vjeçar, një pronar i një bari në Beyoglu, qarku kryesor i jetës së natës në Stamboll.

Ai nuk dëshiron një përsëritje të vitit 2005, kur në atë që quhet “Mrekullia e Stambollit”, Liverpooli u kthye nga disavantazhi prej tre golave dhe triumfoi pas penalltive ndaj Milanit në finale të Ligës së Kampionëve. Tifozët e Liverpoolit festuan nëpër bare deri në mëngjes pas fitores së madhe të skuadrës, duke konsumuar sasi të madhe të alkoolit.

“Ne nisëm të shisnim çfarëdo që na kishte mbetur. Ne mbetëm pa birra, kështu që u jepnim viski, e më pas vodka. E më pas xhin dhe çdo raki tjetër”, ka thënë Dogan.

Liverpooli ka marrë 5.973 bileta për finale, ndërsa Chelsea ka kërkuar 1.314 bileta në stadiumin e Beshiktashit që ka kapacitet 41 mijë ulëse.