Qeveria e Kosovës ka miratuar kërkesën e Ministrisë së Shëndetësisë për pagesën e specializantëve me vetëfinancim për datës 1 janar 2023 deri më datë 31 dhjetor 2023, raporton Ekonomia Online.
Ministri i Shëndetësisë Arben Vitia ka thënë se të njëjtit gjatë shkollimit specialistik kontribuojnë në shëndetësinë e Kosovës.
Vitia, tutje u shpreh i shqetësuar edhe me ikjen e kuadrove shëndetësore nga Kosova, ku tha se rol të drejtpërdrejt ka stimulimi dhe krijimi i një ambienti tërheqës për ta nga vendet e tjera/
“Përveç kësaj, edhe vendet e tjera tash e një kohë po përballen me këtë problematikë ndaj së cilës kanë ndërmarrë hapa për të rritur numrin e mjekëve përmes stimulimit dhe krijimit të një ambienti tërheqës për ta. Në ndikimin e këtyre masave, Kosova po ndikohet drejtpërdrejt në ikjen e kuadrove shëndetësore, andaj ministria e konsideron pagesën e specializantëve me vetëfinancim si çështje me prioritet për vendin”, është shprehur Vitia.
Po ashtu, në mbledhjen e sotme, qeveria mori vendim edhe për pagesën e 10 specializantëve me vetëfinancim nga Shqipëria, Maqedonia e Veriut e Mali i Zi.