Administrata e re e Polonisë ka njoftuar se po shkarkon drejtuesit e mediave shtetërore që shiheshin gjerësisht si zëdhënëse të qeverisë gjatë tetë viteve në pushtet të partisë populiste të djathtë Ligj dhe Drejtësi (PiS).

Sipas mediave të huaja, përcjell Telegrafi, shefat dhe bordet e televizionit shtetëror, radios dhe agjencive të lajmeve ishin hequr, tha të mërkurën ministria e kulturës e Polonisë, duke përmendur nevojën për të rivendosur paanshmërinë e tyre.

Mediat shtetërore ishin akuzuar rregullisht për raportime të njëanshme, transmetim të propagandës dhe sulme verbale ndaj opozitës.

Koalicioni i ri qeverisës, i udhëhequr nga kryeministri, Donald Tusk, ishte zotuar se do të përmbushte premtimin e tij të fushatës për të rivendosur televizionin publik.

Dhe të martën ai miratoi një rezolutë që bën thirrje për rivendosjen e “paanësisë dhe besueshmërisë së medias publike”.

Votimi bëri që ligjvënësit e PiS të organizonin një protestë në ndërtesat e televizionit shtetëror.

“Nuk ka demokraci pa pluralizëm mediatik apo media të forta anti-qeveritare, dhe në Poloni këto janë media publike”, u tha gazetarëve në hyrje të ndërtesës së televizionit shtetëror të martën në mbrëmje lideri i PiS, Jarosław Kaczyński.

Kaczyński ishte në mesin e atyre që protestuan, së bashku me ish-kryeministrin Mateusz Morawiecki i cili u pa në mediat sociale duke pozuar për foto me punonjësit e transmetuesit.