Rusia po paralajmëron se është rrezik real që kriza aktuale në Gaza “të përshkallëzohet në një konflikt në mbarë rajonin”.

Ministri i Jashtëm, Sergej Lavrov, kritikoi gjithashtu Shtetet e Bashkuara të Amerikës për veton ndaj një rezolute të OKB-së që bën thirrje për një armëpushim, e cila ai tha se tani mund të çojë konfliktin në rritje.

“Ne jemi dëshmitarë të përpjekjeve për të fajësuar sërish Iranin për gjithçka. Ne i konsiderojmë këto akuza mjaft provokuese. Udhëheqja iraniane merr një pozicion të përgjegjshëm, të balancuar dhe bën thirrje për parandalimin e përhapjes së këtij konflikti në të gjithë rajonin – në vendet fqinje”, tha Lavrov.

I pyetur për mënyrat për të ndaluar gjakderdhjen, Lavrov tha se një rezolutë e Këshillit të Sigurimit të OKB-së që u bën thirrje të gjitha palëve që menjëherë t’i japin fund armiqësive është mënyra më e mirë përpara.

“Cilat janë perspektivat? Unë supozoj se konsultimet me vendet e interesuara do të vazhdojnë. Egjipti po merr iniciativën. Ne të gjithë do të dëshironim të shihnim de-përshkallëzimin në Rripin e Gazës”, tha ai, shkruan AlJazeera, transmeton Klankosova.tv.