Sekretari i Thesarit i ShBA-së, Scott Bessent, tha sot se beson që Kina do të përdorë ndikimin e saj mbi Iranin për të ndihmuar në rihapjen e Ngushticës së Hormuzit për trafikun.

“Është në interesin e tyre të madh të rihapin ngushticën”, tha Bessent për CNBC.

“Unë besoj se ata do të veprojnë prapa skenave, duke pasur parasysh se janë ata që kanë ndikimin më të madh mbi udhëheqjen iraniane.”

Kina është importuesja më e madhe në botë e naftës bruto dhe, sipas Administratës Amerikane të Informacionit për Energjinë, në vitin 2024, rreth 10% e importeve erdhën nga Irani, ndërsa më shumë se gjysma erdhën nga Lindja e Mesme.

Ministri vuri në dukje se pothuajse të gjitha eksportet e naftës bruto të Iranit shkojnë në Kinë. “Kina ka një interes shumë më të madh në rihapjen e ngushticës sesa Shtetet e Bashkuara”, shtoi Bessent.