Shqetësimet e ngritura për mundësinë e nxitjes së një lufte në Ballkan nga Rusia, do ta sjellin në rajon shefin e NATO-s, Jens Stoltenberg.

Ciklin e vizitave ai do ta nisë të dielën në Bosnje dhe Hercegovinë.

Kurse të hënën, sekretari i përgjithshëm i aleancës ushtarake veri-atlantike do të jetë në Kosovë do të zhvillojë takime me krerët e shtetit, po ashtu edhe KFOR-it.

“Do të ketë diskutime me znj. Vjosa Osmani-Sadriu dhe z. Albin Kurti. Ai gjithashtu do të vizitoj kampin Nothing Hill të KFOR-it të NATO-s, ku do të takohet me komandantin e KFOR-it, gjeneralmajor Ulutaş dhe do t’u drejtohet trupave. Ai do të takohet gjithashtu me Drejtorin e Ekipit Këshillues dhe Ndërlidhës të NATO-s, gjeneralin Hammerstein”, thuhet në njoftimin e faqes zyrtare të NATO-s.

E, kjo vizitë nuk po duket të jetë e rastësishme, sepse njohësit e sigurisë në vend po e lidhin atë me paralajmërimin e Presidentit të Ukrainës, Volodimyr Zelensky i cili ka thënë që Rusia po synon të nisë një luftë në Ballkan.

“Kjo vizite lidhet me ketë deklaratë jo në mënyrë të drejtpërdrejt por që ka të bëjë me shqetësimet që i ka NATO në përgjegjësi për situatën në Kosovë dhe në Ballkan prandaj edhe vizita e tij me krerët e shtetit dhe komandantin e KFOR është tregues se ai në aspektin diplomatik dhe politik ka shqetësimet e tija për sa I përket sigurisë në Kosovë”, ka thënë Hysen Gecaj.

Ndërsa sipas ish-zëvendësministrit të Punëve të Brendshme, Izmi Zeka, shteti i Kosovës duhet të informohet vazhdimisht për gjendjen e sigurisë në rajon.

“Është çështje ekzistenciale vizita e tij në Kosovë dhe jo vetëm për të parë situatën se çfarë por njëkohësisht po shpresoj edhe për të marr informata për situatën në të cilën gjendemi prandaj duhet një komunikim i vazhdueshëm sidomos ne NATO-n e SHBA-të”, ka thënë Zeka.

Pas Kosovës, shefi i NATO-s do të vazhdoj vizitën në Serbi dhe pastaj në Shqipëri.

Në Tiranë, Stoltenberg do të marrë pjesë në një takim me liderët e shteteve aleate nga rajoni, ku përfshihen Kroacia, Sllovenia, Mali i Zi.