Një pajisje e re e Samsungut është shfaqur në uebfaqen e njohur Geekbench me emër të modelit SM-A750FN. Po ashtu, në këtë uebfaqe janë zbuluar edhe disa specifika kyçe të kësaj pajisjeje misterioze.

Pajisja, sipas Geekbench, do të ketë procesor Exynos 7885 SoC, 4 GB RAM memorie si dhe do të punojë me sistemin operativ Android Oreo 8.0, transmeton Koha.net. Këto specifika përkojnë me ato të Galaxy A8+ (2018), duke sugjeruar se telefoni mund të jetë më ndryshe në aspektet tjera sikurse madhësia e ekranit apo kamerat.

Samsung Galaxy A8 (2018) mban numrin e modelit SM-A730xx, ndërsa paraardhësi i tij Galaxy A7 (2017) – SM-A720xx. Duke u bazuar në këtë fakt, SM-A750FN është logjikisht pasardhës i serisë Galaxy A8.

SM-A750FN mund të quhet Galaxy A9 (2018), por po ashtu mund të jetë edhe shtesë në serinë A8 për tregjet e caktuara.