Çdo ditë në raportin 24 orësh të Policisë së Kosovës, deklarohen dhuna të ndryshme në familjet kosovare.

Veç sot në raportin e policisë janë njoftuar katër raste. Dy në Prishtinë, një në Podujevë dhe një në Mitrovicën Veriore, transmeton Koha.net.

Dje një grua në Prishtinë, kosovare-shqiptare, ka raportuar se pas një mosmarrëveshje me bashkëshortin e saj, ai e ka gjuajtur me një vazo duke e goditur në këmbë me ç’rast i ka shkaktuar lëndime trupore për të cilat lëndime i është ofruar tretmani mjekësor.

“Me vendim të prokurorit i dyshuari lirohet në procedurë të rregullt”, thotë policia.

Rasti tjetër po ashtu në Prishtinë, ka rezultuar me një të arrestuar. Një burrë është arrestuar pasi që i njëjti kishte sulmuar fizikisht babanë e tij. Ai ka pranuar tretman mjekësor e me vendim të prokurorit i dyshuari është dërguar në mbajtje.

Në Podujevë, një grua ka raportuar se me datën 15.11.2018 është sulmuar fizikisht nga i dyshuari mashkull kosovar-shqiptar me të cilin bashkëjeton dhe kanë një fëmijë tre muajsh.

“Pas intervistimit me vendim të prokurorit rasti shkon në procedurë të rregullt”, thotë policia në raport.

E në rrugën “Lole Ribar”, në Mitrovicën Veriore, është arrestuar i dyshuari mashkull kosovar-serb pasi që i njëjti kishte shkelur urdhrin mbrojtës të gjykatës duke sulmuar fizikisht viktimën (bashkëshorten jashtëmartesore) kosovare-serbe, në praninë e dy fëmijëve të mitur duke i shkaktuar lëndime trupore.

“ Viktima ka pranuar tretman mjekësor, ndërsa i dyshuari me vendim të prokurorit dërgohet në mbajtje”, përfundon raportin policia.