“Osa Termosistem Final 8” do të jetë spektakël i basketbollit nga 11 deri më 15 shkurt në Rahovec. Tetë skuadra në garë për trofeun e çmuar të Kupës. Tetë tifozëri premtojnë atmosferë të jashtëzakonshme për pesë ditë me radhë në palestrën “Mizair Isma”.

Një nga skuadrat që e synon Kupën është Rahoveci. Kapiteni i kësaj skuadre, Bardh Rexha, beson se Kupa do të mbetet në Rahovec.

“Jemi falënderues Federatës së Basketbollit të Kosovës që na është besuar sërish organizimi i Kupës në Rahovec. Ne jemi duke u përgatitur maksimalisht, pasi jemi edhe organizator dhe besoj se Kupa do të mbetet në Rahovec. Ne jemi përgatitur maksimalisht për garat e Kupës, një trofe shumë i rëndësishëm për ne”, është shprehur Rexha për faqen zyrtare të FBK-së.

Rahoveci në çerekfinale do të ndeshet me Trepçën. Rahoveci është lider i renditjes, derisa edicionin e kaluar ishte në finale të Kupës dhe “Play-off”-it.

Kjo është hera e dytë radhazi që “Final 8” do të zhvillohet në qytetin e Rahovecit. Edicioni i kaluar ishte i organizuar për mrekulli, derisa organizatorët besojnë se këtë vit do të jetë edhe më mirë dhe spektakël i basketbollit që nuk është parë asnjëherë deri më tani. Telegrafi.