Politologu, Ramush Tahiri po e sheh të nevojshme reformën zgjedhore, në mënyrë që Kuvendi ta forcojë kontrollin mbi Qeverinë.

Tahiri në një intervistë për Ekonomia Online ka thënë se Kuvendi gjithmonë po shndërrohet në “dorë të zgjatur të Qeverisë”.

“Parlamenti te ne është dorë e zgjatur e qeverisë asnjëherë nuk ka ndodh që parlamenti me rrëzuar një projektligj ose me ndryshuar, dhe gjithmonë kemi zënka pozitë dhe opozitë por asnjëherë nuk kemi diçka që është interes i popullit. Unë jam që me pas reformë zgjedhore dhe ligjor dhe me e forcuar kontrollin e kuvendit ndaj qeverisë dhe kjo na bënë shtet demokratik”.

Ai në një intervistë për Ekonomia Online ka komentuar edhe programet e subjekteve politik, madje i ka cilësuar si dëshira të babadimrit.

Tahiri thotë se partitë politike kanë dhënë premtime afërsisht të njëjta.

“Janë bërë si dëshira të babadimrit edhe premtime me para dhe me rritje të rrogave, me investime me shpërndarje miliardësh dhe do të ishte krejt mirë sikur krejt t’i binin këto para nga jashtë, dhe është shumë keq se këto para janë taksa tona dhe këta vetëm e distribuojnë edhe po na tregojnë se paratë tona dinë të distribuojnë më mirë se sa që dimë na”.

“Janë premtime të pamatura që nuk duhet me i zanë besë dhe nuk po ka analizë nga ekspertë nga ekonomistë të cilët tregojnë se shpërndarja e buxhetit në këtë mënyrë është me u sjellë jo me nikoqirllëk ndaj buxhetit të Kosovës”.

Madje ai është i bindur se me formimin e Qeverisë që pritet pas 14 shkurtit asnjëra nga partitë nuk do ta respektojë programin.

“Gjithë partitë politike s’besoj që dikush i lexon programet se besoj që edhe kur të bëhet qeveria asnjëra prej tyre nuk e ka respektuar duke e përfshirë edhe VV-në që duke se është një Qeveri në ardhje”.

Sipas tij, rezultati cilido i zgjedhjeve që do të jetë duhet të pranohet nga partitë politike, pasi që siç thotë ai mospranimi i rezultateve rrezikon që partitë politike të hynë në ciklin e anarkisë.

“Sondazhet e fundit të PIPO-s duken reale, me rëndësi është që votimet me qenë të drejta mu pranuar rezultatet e votimeve dhe Kosova duhet të evitojë rrezikun që mos me u pranuar zgjedhjet, dhe një parti e cila nuk është e kënaqur me rezultatet dhe mos me i pranuar dhe me hy në ciklin e anarkisë. Shihet që asnjë parti nuk do ta bënë qeverinë vet dhe do të kemi koalicione dhe do të kemi harmonizim të programeve për qeverisje”.

Zgjedhjet nacionale në vend pritet të mbahen të dielën me 14 shkurt.