Roland Bartetzko, ish-ushtar gjerman i cili luftoi në Ushtrinë Çlirimtare të Kosovës në luftën me Serbinë, ia ka bërë një analizë armatimit të Ukrainës në pritje të një sulmi nga Rusia, i cili u paralajmërua nga Shtetet e Bashkuara të Amerikës.

Bartetzko e ka dhënë analizën e tij në faqen e madhe sociale amerikane, Quora, me titullin “Reuters raporton se Britania e Madhe po dërgon armë antitank në Ukrainë. A mund të jenë këto armët më të rëndësishme dhe më të dobishme për Ukrainën?”.

Britania deri më tani ka dorëzuar rreth 2,000 raketa N-LAW kundër tankeve në Ukrainë.

“N-LAW (Arma Anti-tanke e Gjeneratës së ardhshme) është një armë portative këmbësorie me një distancë mjaft të kufizuar (600 metra) dhe një mekanizëm të thjeshtë synimi të “linjës së shikimit”. Mund të qëllohet nga një hapësirë ​​e mbyllur dhe është në gjendje të godasë në mënyrë efektive çdo tank modern”, shkruan ai.

“Pra, sa e rëndësishme dhe e dobishme është kjo armë për mbrojtjen e Ukrainës?”, pyet Bartetzko, duke dhënë edhe përgjigjen.

Para së gjithash, kërcënimi rus i tankeve nuk është shqetësimi më i madh i Ukrainës, thotë ai. Taktikat ushtarake ruse zakonisht “rrafshojnë” një zonë me artileri dhe sulme ajrore përpara se t’i dërgojnë tanket dhe këmbësorinë e tyre, kujton Bartetzko.

“As N-LAW dhe as “Javelins” të prodhuara nga SHBA-ja (që u dorëzuan në Ukrainë më herët) nuk janë në gjendje ta rrëzojnë një avion. Ajo që ukrainasve u duhet urgjentisht janë sistemet moderne të raketave anti-ajrore dhe të ashtuquajturat MANPADS, për shembull, “Stinger II” të prodhuara në SHBA ose armë të ngjashme”, shkruan Bartetzko.

“Për më tepër, kërcënimi nga artileria dhe artileria e raketave ruse mund të kundërshtohet vetëm me artilerinë e Ukrainës dhe me sulme ajrore. Për të qenë në gjendje ta bëjë këtë, ky vend ka nevojë për sisteme moderne artilerie (për shembull, Panzerhaubitze 2000), radarë kundër baterive, aftësi anti-raketë dhe një forcë të fuqishme ajrore. 2000 armë të lehta antitank dore nuk do ta bëjnë këtë punë”, shton ai.

Por edhe kur bëhet fjalë për zbrapsjen e tankeve të armikut, sipas tij, ka armë shumë më të mira përreth sesa N-LAW.

“Për shkak të rrezes së tyre relativisht të shkurtër, këto nuk janë të përshtatshme për të kapur një forcë tankesh ruse në hapësirë. Arma e një tanku rus T-90, për shembull, ka një rreze efektive deri në 5000 metra; shumë përtej mundësive të N-LAW (600 metra). Operatorët ukrainas të këtij sistemi të armëve do të jenë në gjendje t’i përdorin në mënyrë efektive armët e tyre vetëm në mjedise urbane dhe pyje”, shkruan Bartetzko, duke konstatuar se këto armë nuk bëjnë shumë punë.

Rreth 90 tonë të “ndihmës vdekjeprurëse” të Shteteve të Bashkuara ka arritur në Ukrainë, teksa tensionet janë të larta për shkak të grumbullimit të ushtrisë ruse përgjatë kufirit me Ukrainën.

Kjo ishte dërgesa e parë e pakos së ndihmës të miratuar së fundmi nga ushtria amerikane për Ukrainën, ku përfshihen edhe municione për “mbrojtësit në vijën e parë” të frontit.

Kjo dërgesë arriti në Ukrainë pas vizitës së Sekretarit amerikan të Shtetit, Antony Blinken në Kiev gjatë kësaj jave, nga ku ai paralajmëroi përgjigje të ashpër nëse Rusia e pushton Ukrainën.