Ka vdekur sot avokati i njohur kosovar, Ekrem Shabani.

Lajmin për vdekjen e tij e ka bërë të ditur kryetari i Ferizajt, Agim Aliu, duke e cilësuar lart veprën e të ndjerit Shabani.

“Me pikëllim të thellë mora lajmin për ndarjen nga jeta të veprimtarit të dalluar të çështjes kombëtare sypatrembur gjithnjë para okupatorit serb, qytetarit të dalluar, kryeprokurorit, avokatit e ish-punonjësit të Komunës, prindit të përkushtuar e shembullit të personalitetit, që me punën e tij la gjurmë në sistemin tonë të drejtësisë, Ekrem Shabani.

Sot Ferizaj është më i varfër. Familja humbi më të dashurin, gjersa ne humbëm një qytetar model. Vepra e tij e bën personalitetin e tij të papërsëritshëm, gjithnjë të respektuar e referencë të përkushtimit profesional e njerëzor.

Ngushëllime të sinqerta familjes së respektuar Shabani, miqve, kolegëve të të ndjerit dhe gjithë qytetarëve ferizajas dhe jo vetëm, që patin fatin të punojnë me të ndjerin. Qoftë kujtimi e vepra e tij, fanar ndriçues në rrugën e ecjes sonë përpara”, shkruan Aliu në ngushëllim.