Kryetari i Komunës së Kamenicës, Qëdnron Kastrati ka reaguar pas hyrjes së forcave të xhandarmërisë serbe në fshatin Karaqevw të Komunës së Kamenicës. Ai ka thënë se është e papranueshme hyrja e xhandarmërisë serbe në territorin e Kosovës, të shpallur gabimisht me marrëveshje të Kumanovës si zonë neutrale, raporton Ekonomia Online.

Kastrati, ka thënë se terrorizimi i banorëve të Karaqevës nga forcat serbe është i papranueshëm dhe për këtë duhet të bartin përgjegjësi edhe forcat e KFOR-it.

“ Ajo zonë është përcaktuar si zonë neutrale (edhe pse gabimisht) dhe e vetmja forcë që ka të drejtë hyrje në atë zonë është KFOR-i. Hyrja e xhandarmërisë serbe në atë zonë dhe kontrollat që i bëjnë njerëzve është kërcënim direkt për qytetarët e Karaqevës në veçanti dhe për gjithë shtetin e Kosovës në përgjithësi.”, ka shkruar Kastrati në Facebook.

Ai ka thënë se është duke shkuar në Karaqevë për qenë afër banorëve.

“U desh të largohem në gjysmë të takimit dhe diskutimit me kryetarët e komunave të regjionit tonë për hapat që duhet të ndërmarrim si regjion për trajtimin e COVID-19 dhe në këto momente jam duke shkuar pranë atyre qytetarëve që po përballen me këtë situatë kërcënuese. Kjo është e papranueshme”, ka shkruar ai.