Zyrtarët e lartë rusë në Kremlin dhe në rajone u është ndaluar t’i lënë postet e tyre, pretendon IStories, një media e pavarur ruse, raporton CNN.
IStories është një gazetë investigative online e bazuar jashtë Rusisë dhe drejtohet nga një gazetar i njohur me emrin Roman Aninn, i cili tha se burimet e tij përfshinin njohje të zyrtarëve të lartë në administratën presidenciale.
Aninn tha se nuk e dinte se sa njerëz ishin përpjekur të largoheshin, por nuk ishin lejuar. “Megjithatë, unë di shembuj konkretë të atyre që u përpoqën të largoheshin. Këta janë guvernatorët, nga forcat e sigurisë dhe njerëz nga administrata presidenciale”, deklaroi ai.
Gazetari nuk pranoi të jepte emra për të mbrojtur burimet e tij.
IStories tha se ishte thënë nga një ish-oficer i Shërbimit Federal të Sigurisë (FSB) se ai dinte për “të paktën dy raste kur guvernatorët u përpoqën të largoheshin nga postet e tyre”, por Departamenti i Politikës së Brendshme të Administratës Presidenciale i kishte ndaluar ata të jepnin dorëheqjen dhe kishte lënë të kuptohet për çështje penale kundër tyre.
Sipas një dekreti presidencial, ushtarakët me kontratë (që do të përfshinte shumicën e punonjësve të FSB-së) nuk mund të largohen edhe pas skadimit të kontratës së tyre.
Ndalimi ka dy qëllime, tha Aninn. Nëse shumë njerëz largohen, atëherë administrata publike mund të bëhet e pamenaxhueshme, kështu që ndalimi do të “parandalonte humbjen e kontrollit”, tha ai, duke shtuar se qëllimi tjetër është “t’u tregojmë njerëzve dhe vartësve se autoritetet janë të bashkuara, se të gjithë janë në vend dhe askush nuk do të ikë”.