Katër pjesëtarë të Njësisë Speciale të Policisë së Kosovës janë suspenduar, pasi në një grup privat kolegësh kishin reaguar me emoji ndaj një fotografie të kryekuvendarit Dimal Basha.

Ish-kryeinspektori i Agjencisë Kosovare të Inteligjencës (AKI), Burim Ramadani, në një intervistë për Kosova Live e ka cilësuar këtë veprim si cenim të privatësisë së policëve dhe shfrytëzim të rastit për arsye politike.

“Secili polic, përveç detyrës, ka edhe privatësinë e vet. Nuk mund të merret një komunikim i brendshëm mes kolegësh dhe të kthehet në arsye për masa disiplinore. Kjo është shkelje e të drejtës themelore të privatësisë”, deklaroi ai.

Ramadani shtoi se për 26 vjet është investuar në ndërtimin e besimit dhe profesionalizmit të institucioneve të sigurisë, por vendime të tilla rrezikojnë të shndërrohen në presion politik të papranueshëm ndaj Policisë së Kosovës.

Sipas tij, suspendimi është masë e rëndë, e cila merret vetëm në rast të shkeljeve serioze disiplinore ose penale dhe në këtë rast nuk ekziston asnjë element i tillë.