Barcelona ka plane të nënshkruajë të paktën një mbrojtës sapo të hapet afati dimëror i transferimeve më vonë këtë javë. Situatat me Andreas Christensenin (i dëmtuar) dhe Ronald Araújon (leje mungese) e kanë detyruar klubin katalanas t’i përshpejtojë planet për një qendërmbrojtës, por në agjendë mund të jetë edhe afrimi i një mbrojtësi krahu.

Skuadra e Hansi Flick ka mungesë të theksuar thellësie si në krahun e djathtë ashtu edhe në të majtin të mbrojtjes. Jules Koundé është i vetmi lojtar natyral në të djathtë, ndërsa e njëjta vlen për Alejandro Balden në të majtë – duke qenë se Gerard Martín tashmë po aktivizohet në qendër. Në këtë drejtim, ekziston hapësirë për afrimin e një mbrojtësi të ri krahu.

Flick kishte kërkuar tashmë një mbrojtës të djathtë më herët gjatë këtij viti dhe kjo dëshirë mund t’i plotësohet së shpejti. Sipas raportimeve nga Arabia Saudite (përmes Sport), Barcelona është lidhur me një lëvizje të mundshme në janar për João Cancelon.

Cancelo është i interesuar të largohet nga Al Hilal, pasi ka rënë nga planet e trajnerit Simone Inzaghi. Ai ka nevojë të luajë rregullisht për të siguruar vendin në përfaqësuesen e Portugalisë për Kupën e Botës 2026, dhe aktivizimi në një nga pesë ligat kryesore të Europës do t’i jepte shanset më të mira.

Cancelo e kaloi sezonin 2023/24 si i huazuar te Barcelona dhe, ndonëse pati disa paraqitje të dobëta të profilit të lartë, ai kujtohet me simpati nga figura si drejtori sportiv Deco. Një marrëveshje mund të merret në konsideratë nëse Al Hilal mbulon pjesën dërrmuese të pagës së tij, duke qenë se katalanasit kanë shumë pak hapësirë në fondin e pagave.

Sistemi tejet ofensiv i Flick mund t’i përshtatet Cancelos më shumë sesa ai në të cilin luajti nën drejtimin e Xavi Hernandezit. Në këtë aspekt, rikthimi i mbrojtësit 31-vjeçar mund të jetë një ide e mirë për Barcelonën. Megjithatë, gjithçka do të varet nga aspekti financiar, i cili mbetet larg së qenuri i garantuar.