Kandidati për kryeministër nga radhët e AAK-së, njëherësh nënkryetari i këtij subjekti Ardian Gjini, përmes një deklarate emocionuese, ka bërë thirrje për rikthimin e unitetit dhe vizionit kombëtar, duke theksuar se Kosova nuk guxon ta humbasë rrugën dhe ëndrrën e saj.

Gjini riktheu në kujtesë vitet e vështira të 80-tave dhe 90-tave, kur populli i Kosovës, i bashkuar rreth një qëllimi të vetëm, këndonte “Besa-Besë” në Stadiumin e Prishtinës, duke ditur saktësisht se çfarë kërkonte.

“Kosova duhet me e kthy andrrën e vet. Ne e kemi pasur një ëndërr që nga fëmijëria. Atë ëndërr që nuk mundi ta thyente askush, as regjimet më shtypëse. Ishte pikërisht kjo ëndërr që prodhoi ata djem e ato vajza që luftuan për lirinë tonë,” u shpreh Gjini.

Sipas tij, arritja e pavarësisë ishte vetëm një stacion, por populli duhet të vazhdojë të ushqejë vizionin për të ardhmen, pasi pa të, rrezikohet shtylla kryesore e shoqërisë: solidariteti.

“Nuk guxon kush me e mbyt vizionin, sepse kur vdes vizioni, gjithçka tjetër shkapërderdhet. Solidariteti do të thotë që nëse ka vërshime në Kaçanik, të mërzitem unë në Gjakovë dhe anasjelltas. Pa ëndërr, ne fillojmë të mos e duam njëri-tjetrin, rriten ekstremizmat dhe nuk na intereson më e ardhmja e fëmijëve tanë pas 10 vitesh,” tha Gjini.

Gjini përfundoi duke thënë se respekti dhe dashuria për njëri-tjetrin janë të lidhura ngushtë me ëndrrën tonë të përbashkët për shtetin, dhe se kjo frymë duhet të rikthehet për t’i dhënë kuptim punës dhe sakrificës së brezave të tërë.