Lideri Suprem i Iranit, Mojtaba Khamenei, ka deklaruar se nuk ishte në favor të arritjes së një marrëveshjeje me Shtetet e Bashkuara, por se lejoi vazhdimin e procesit pasi presidenti iranian mori përgjegjësinë për negociatat.

Në një deklaratë publike, Khamenei tha se kishte rezerva të mëdha ndaj marrëveshjes së arritur me administratën amerikane dhe kritikoi presidentin amerikan Donald Trump, duke pretenduar se Uashingtoni kishte ushtruar presion të vazhdueshëm për finalizimin e saj.

Sipas tij, vendimi për të ecur përpara me memorandumit e mirëkuptimit u mor pasi presidenti i Iranit garantoi se do të mbante përgjegjësi për rezultatet e procesit.

“Presidenti deklaroi se do ta merrte përsipër përgjegjësinë për këtë çështje, prandaj dhashë lejen që procesi të vazhdonte”, thuhet në deklaratën e liderit iranian.

Khamenei theksoi se negociatat kanë qenë të vështira dhe të shoqëruara me presione ndërkombëtare, por shtoi se dialogu me SHBA-në nuk nënkupton ndryshim të qëndrimit politik të Teheranit.

Ai nënvizoi se zhvillimi i bisedimeve të drejtpërdrejta nuk duhet të interpretohet si pranim i pozicioneve amerikane, duke theksuar se Irani do të vazhdojë të mbrojë interesat e tij kombëtare.

Deklarata e tij vjen një ditë pas nënshkrimit të memorandumit të mirëkuptimit mes Iranit dhe SHBA-së, i cili parashikon vazhdimin e negociatave për arritjen e një marrëveshjeje përfundimtare brenda 60 ditëve të ardhshme.