Manchester City ka marrë një goditje të rëndë para fillimit të sezonit të ri, pasi mesfushori Rodri do t’i nënshtrohet një operacioni pas përfundimit të Kupës së Botës, duke rrezikuar të humbasë javët e para të edicionit 2026/27.

Rodri me një dëmtim ende të pazbuluar

Sipas Daily Mail, fituesi i Topit të Artë 2024 po përballet me një dëmtim, detajet e të cilit nuk janë bërë publike, por që kërkon ndërhyrje kirurgjikale.

Operacioni pritet të kryhet sapo Spanja të përfundojë rrugëtimin e saj në Kupën e Botës, çka do të bëjë që 30-vjeçari të mungojë në pjesën më të madhe të fazës përgatitore të Manchester Cityt.

Fillim i vështirë për Marescan

Lajmi është një goditje e madhe për trajnerin e ri Enzo Maresca, i cili shpresonte ta niste aventurën e tij në “Etihad” me skuadrën e plotë.

“Manchester City është një klub që e njoh shumë mirë. Është një mundësi e jashtëzakonshme për mua dhe mezi pres të punoj me lojtarët. Dua të fitojmë, të luajmë futboll të bukur dhe të përballojmë presionin që sjell përfaqësimi i këtij klubi”, kishte deklaruar Maresca pas emërimit.

Megjithatë, mungesa e Rodrit pritet të jetë një sfidë e madhe, pasi mesfushori spanjoll konsiderohet shtylla kryesore e lojës së Cityt.

E ardhmja ende e paqartë

Përveç dëmtimit, Rodri po hyn edhe në vitin e fundit të kontratës me Manchester Cityn.

Klubi i ka ofruar rinovim, por negociatat ende nuk kanë sjellë marrëveshje, ndërsa interesimi i Real Madridit vazhdon të mbetet i fortë.

Nëse situata nuk zgjidhet deri në fund të vitit, Rodri do të ketë të drejtë të nënshkruajë një parakontratë me një klub jashtë Anglisë që nga 1 janari.

Një tjetër sfidë pas rikthimit nga dëmtimi

Rodri vazhdon të përballet me probleme fizike që nga dëmtimi i rëndë i ligamentit të kryqëzuar, të pësuar gati dy vite më parë.

Edhe pse u rikthye në formën më të mirë duke fituar Topin e Artë, ky operacion i ri ngre pikëpyetje për gjendjen e tij fizike dhe ndikimin e ngarkesës së madhe në vitet e fundit.

Sezonin e kaluar, Rodri zhvilloi 33 ndeshje me Manchester Cityn, shënoi dy gola dhe shtoi në koleksionin e tij katër tituj të Premier League, një Ligë të Kampionëve, dy FA Cup, tre Kupa të Ligës, si dhe trofe të tjerë ndërkombëtarë. /GazetaExpress/