Rrugët e Teheranit ishin dukshëm më të mbushura të dielën, ndërsa ceremonitë mortore për udhëheqësin e ndjerë suprem të Iranit po merrnin vrull. Gjatë natës, besimtarët u mblodhën në kompleksin e xhamisë ku trupat e Ajatollah Ali Khameneit dhe anëtarëve të familjes së tij janë vendosur për homazhe, shkruan CNN.

Gjatë paradites, një lumë vajtuesish të veshur me të zeza u derdh nga Grand Mosalla. Pelegrinëve u ofroheshin pije freskuese nga stendat e vendosura përgjatë rrugëve aty pranë.

Një thirrje sfiduese për hakmarrje u dëgjua pothuajse në çdo bisedë që ekipi i CNN-it në Teheran zhvilloi me vajtuesit.

“Vetë kjo është hakmarrja”, tha Sara, 45 vjeç, duke iu referuar turmave që kalonin pranë. “Ata duhet ta kuptojnë se uniteti i popullit është hakmarrja”.

Aziz Hatemi, 58 vjeç, tha se kishte udhëtuar rreth 1.000 kilometra nëpër vend për të marrë pjesë në funeral.

“Forca jonë shihet këtu”, i tha ai CNN-it.

Frika nga sulmet ajrore ndaj Iranit, e cila kishte dominuar shumë nga bisedat me banorët vendas gjatë luftës, është zhdukur. Por një zemërim i thellë, veçanërisht për vrasjen e Khameneit të ndjerë, vazhdon të shfaqet pothuajse në çdo bisedë.

Sa i përket Presidentit amerikan Donald Trump, mesazhi i turmave, të dominuara nga shumica konservatore e vendit, ishte i thjeshtë.

“Shpresojmë që ai dhe e gjithë familja e tij të vdesin” i tha CNN-it zonja Baqat, 54 vjeçe.