Liverpool mund të ketë një arsye shtesë për të ndjekur me vëmendje çerekfinalen e Botërorit mes Francës dhe Marokut. Përtej betejës në fushë, në prapaskenë po zhvillohet një sagë e rëndësishme transferimesh që mund ta çojë Bradley Barcola në “Anfield”, si zëvendësues të Mohamed Salah.

Sulmuesi francez ka hedhur dyshime mbi të ardhmen e tij te Paris Saint-Germain, duke pranuar se ende nuk e di se ku do të jetë pas përfundimit të Botërorit. Kjo deklaratë ka rritur spekulimet për një largim, ndërsa bisedimet për rinovimin e kontratës janë pezulluar për shkak të pakënaqësisë së lojtarit me minutat që po merr në Paris.

Për Liverpoolin, i cili po kërkon një emër të madh pas largimit të Salah në fund të sezonit 2025/26, Barcola shihet si një nga alternativat më tërheqëse.

Nga titullar i pritshëm në rezervë luksi

Kur u transferua nga Lyoni te PSG, pritshmëritë ishin që Barcola të bëhej një nga liderët e projektit parisien. Megjithatë, gjërat nuk kanë shkuar sipas planit.

Pas një sezoni të parë pozitiv, me 14 kontribute në gola, konkurrenca u rrit ndjeshëm. Fillimisht erdhi Désiré Doué, ndërsa në janar të vitit 2025 PSG transferoi edhe Khvicha Kvaratskhelian, duke e shtyrë francezin gjithnjë e më poshtë në hierarki.

Edhe pse sezoni 2024/25 ishte statistikisht i shkëlqyer, me 21 gola dhe 21 asistime, Luis Enrique shpesh e la në stol në ndeshjet më të rëndësishme, përfshirë finalen e Ligës së Kampionëve ndaj Interit. Edhe kur luante, rrallëherë e përfundonte ndeshjen.

Në sezonin pasues, forma e tij ra ndjeshëm, duke regjistruar vetëm 13 gola dhe shtatë asistime. Në fazat vendimtare të Ligës së Kampionëve ai mbeti sërish jashtë formacionit titullar, ndërsa në disa sfida të rëndësishme të Ligue 1 nuk u aktivizua fare.

Botëror me ulje-ngritje

As me Francën, Barcola nuk ka arritur të sigurojë një vend të padiskutueshëm.

Ai nuk ishte titullar në ndeshjen hapëse kundër Senegalit, por hyri nga stoli dhe shënoi golin e fitores vetëm dy minuta pas aktivizimit. Më pas startoi ndaj Irakut, por nuk bindi dhe u rikthye në stol në sfidën e fundit të grupeve ndaj Norvegjisë.

Edhe aty ndikoi pozitivisht si zëvendësues, duke asistuar për golin e Désiré Doué. Performanca e mirë i riktheu besimin e Didier Deschamps, i cili e aktivizoi titullar ndaj Suedisë në 1/16 e finales, ku Barcola realizoi një gol të bukur.

Megjithatë, paraqitja e tij zhgënjyese në fitoren 1-0 ndaj Paraguait në 1/8 e finales ka vënë sërish në pikëpyetje vendin e tij në formacion për sfidën çerekfinale ndaj Marokut.

PSG nuk e konsideron më të paprekshëm

Kontrata aktuale e Barcola skadon në vitin 2028, por negociatat për rinovimin kanë ngecur prej kohësh.

Në fillim të verës raportohej se PSG nuk kishte ndërmend ta shiste dhe se kërkonte një shumë shumë më të lartë se 116 milionë paundët që Manchester City pagoi për Elliot Anderson.

Megjithatë, situata duket se ka ndryshuar.

Sipas ekspertit të merkatos Fabrizio Romano, Barcola nuk konsiderohet më i paprekshëm në skuadrën pariziene.

“Deri javën e kaluar ishte i paprekshëm. Tani po lidhet me disa klube. Realiteti është se ai mund të largohet këtë verë. Bisedimet për kontratën e re kanë ngecur plotësisht dhe PSG do të kërkojë një shumë shumë të lartë për kartonin e tij”, ka deklaruar Romano.

Efekti “Diomande”

Një nga arsyet që PSG mund të jetë hapur ndaj shitjes së Barcola lidhet me interesimin për talentin e RB Leipzigut, Yan Diomande.

Liverpool ishte favorit për transferimin e 19-vjeçarit nga Bregu i Fildishtë, por raportimet e fundit tregojnë se lojtari preferon të bashkohet me PSG, duke besuar se projekti i Luis Enriques i ofron mundësinë më të mirë për të fituar trofe dhe, në të ardhmen, edhe “Topin e Artë”.

Leipzigu kërkon rreth 130 milionë euro për Diomanden, një shumë që mund ta detyrojë PSG-në të balancojë financat. Pas largimit të Gonçalo Ramos drejt Milanit dhe transferimit të pritshëm të Lee Kang-in te Atletico Madridi, Barcola mund të jetë emri i radhës që sakrifikohet.

Mundësia ideale për Liverpoolin

Ironikisht, Liverpool mund të përfitojë pikërisht nga dështimi për të transferuar Diomanden.

Në “Anfield”, Barcola do të kishte mundësinë të luante rregullisht dhe të merrte rolin që kërkon. Me largimin e Salah, “The Reds” kanë nevojë për një yll të ri në repartin ofensiv, ndërsa trajneri Andoni Iraola pritet të ndërtojë një sulm të ri, ku francezi mund të jetë figura kryesore.

Shpejtësia, aftësia në duelet një kundër një dhe fleksibiliteti në krahët e sulmit e bëjnë Barcola një profil që përshtatet shumë mirë me stilin ofensiv të Liverpoolit.

Edhe Arsenali është përmendur si një klub i interesuar, por londinezët besohet se aktualisht kanë përparësi transferimin e Morgan Rogers nga Aston Villa.

“Nuk e di çfarë do të ndodhë”

Vetë Barcola nuk ka dhënë garanci për qëndrimin në Paris.

“Për momentin jam plotësisht i fokusuar te Botërori. Për atë që do të ndodhë më pas, sinqerisht nuk e di”, deklaroi ai në konferencën për shtyp para sfidës me Paraguain.

Një gjë duket e qartë: nëse PSG vazhdon të forcojë repartin ofensiv dhe hapësirat për të tkurren edhe më shumë, largimi nga “Parc des Princes” mund të jetë vendimi më i mirë për karrierën e 23-vjeçarit. Dhe nëse kjo ndodh, Liverpool mund të fitojë një lojtar me potencialin për t’u shndërruar në pasuesin e denjë të Mohamed Salah. /GazetaExpress/