Pas përshkallëzimit të tensioneve në Lindjen e Mesme dhe bllokadës së Ngushticës së Hormuzit, sigurimi i anijeve që kalojnë në këtë zonë është bërë shumë më i kushtueshëm.

Tregu i sigurimeve në Londër ka reaguar menjëherë, pasi rreziku për anijet që kalojnë në një nga rrugët më të rëndësishme detare në botë është rritur ndjeshëm. Policat e sigurimit për raste lufte u anuluan dhe më pas u rikthyen me çmime shumë më të larta.

Sipas ekspertëve të sigurimeve, tarifat për anijet që kalojnë nëpër Ngushticën e Hormuzit u rritën nga rreth 0.25–0.5% e vlerës së anijes para krizës, deri në 10% pas sulmeve të para.

Për një cisternë nafte me vlerë 100 milionë dollarë, kjo do të nënkuptonte një kosto sigurimi deri në 10 milionë dollarë për një udhëtim. Aktualisht, tarifat janë ulur në rreth 1–3% të vlerës së anijes.

Disa kompani sigurimi po ofrojnë edhe bonuse për pronarët e anijeve që kalojnë nëpër ngushticë pa incidente, duke u kthyer një pjesë të primit të paguar.

Ekspertët thonë se çmimet e sigurimeve në Hormuz po ndryshojnë pothuajse çdo orë, në varësi të zhvillimeve gjeopolitike. Për shkak të pasigurisë, siguruesit po kërkojnë të vendosin çmimin e policave vetëm disa orë para nisjes së anijeve, ndërsa mbulimi vlen vetëm për disa ditë para se të rinegociohet.