Gjykata e Fierit ka caktuar masa sigurie ndaj tre të miturave të dyshuara për përfshirje në ngjarjen e dhunës ndaj një minoreneje, pamjet e së cilës u publikuan në rrjetet sociale. Me kërkesë të Prokurorisë, janë vendosur masat “Arrest me burg” për shtetasen L.L., “Arrest në shtëpi” për të miturën K.G., ndërsa për të miturën M.R., në konflikt me ligjin, është caktuar masa “Shtrim i përkohshëm në një institucion psikiatrik”.

Sipas Prokurorisë së Fierit, tre të dyshuarat hetohen për veprën penale “Heqja e paligjshme e lirisë”, e parashikuar nga neni 110 i Kodit Penal, kryer në bashkëpunim. Vendimi për masat e sigurisë është marrë në kuadër të procedimit penal nr. 1094 të vitit 2026, që lidhet me rastin e dhunës së ushtruar ndaj një të miture, e cila u bë publike përmes pamjeve të shpërndara në rrjetet sociale.

Prokuroria bën me dije se gjatë hetimeve janë identifikuar personat e përfshirë në ngjarje dhe janë kryer veprime hetimore, të cilat kanë krijuar dyshimin e arsyeshëm për ekzistencën e veprës penale. Sipas organit të akuzës, faktet e mbledhura deri në këtë fazë kanë bërë të nevojshme marrjen e masave të sigurimit personal ndaj personave nën hetim.

Në njoftimin zyrtar, Prokuroria Fier u ka bërë thirrje qytetarëve, administratorëve të faqeve në rrjetet sociale dhe mediave që të shmangin publikimin apo shpërndarjen e pamjeve filmike dhe të dhënave që mund të çojnë në identifikimin e të miturve të përfshirë në ngjarje.

Organi i akuzës thekson se do të vijojë informimin e opinionit publik për zhvillimet e mëtejshme të procedimit penal, duke respektuar sekretin hetimor, privatësinë dhe të drejtat e të miturve të përfshirë në këtë çështje.