Raporti vëren se 97% e foshnjave në Zvicër ushqehen me gji menjëherë pas lindjes, ndërsa rreth gjysma vazhdojnë të ushqehen ekskluzivisht me gji deri në javën e 17.4-të

Pavarësisht se Zvicra ka ndër normat më të larta të fillimit të ushqyerjes me gji në botën e zhvilluar, një raport i ri tregon se vendi mbetet prapa në krijimin e politikave dhe mbështetjes institucionale për nënat.

Sipas vlerësimit ndërkombëtar “Becoming Breastfeeding Friendly”, Zvicra ka marrë vetëm 1.1 nga 3 pikë, duke u renditur në nivel mesatar dhe pas vendeve fqinje si Gjermania dhe Austria.

Ekspertët theksojnë se vendit i mungon një strategji kombëtare për ushqyerjen me gji, financimi i qëndrueshëm, mbledhja e rregullt e të dhënave dhe angazhimi i dukshëm politik në këtë fushë, transmeton albinfo.ch.

Raporti vëren se 97% e foshnjave në Zvicër ushqehen me gji menjëherë pas lindjes, ndërsa rreth gjysma vazhdojnë të ushqehen ekskluzivisht me gji deri në javën e 17.4-të. Megjithatë, kthimi i nënave në punë vazhdon të jetë një nga pengesat kryesore për vazhdimin e kësaj praktike.

Paneli i ekspertëve ka hartuar një sërë rekomandimesh për autoritetet zvicerane, duke kërkuar një strategji kombëtare, investime më të mëdha dhe politika më të forta për të mbështetur nënat. Sipas tyre, përmirësimi i këtyre kushteve do të sjellë përfitime të rëndësishme si për shëndetin e nënave dhe foshnjave, ashtu edhe për sistemin shëndetësor në përgjithësi.