Trafiku përmes Ngushticës së Hormuzit është reduktuar sërish në minimum, pasi Irani pretendoi të dielën se e kishte mbyllur këtë rrugë ujore me rëndësi jetike, tregojnë të dhënat e gjurmimit, shkruan CNN.

Garda Revolucionare Islamike e Iranit tha herët të dielën se Ngushtica ishte mbyllur pasi forcat e saj qëlluan me një të shtënë paralajmëruese ndaj një anijeje, për të cilën thanë se po përpiqej të përdorte një rrugë “të paautorizuar” për të kaluar nëpër këtë rrugë ujore.

Që atëherë, shumë pak anije, përveç një numri të vogël anijesh me flamur iranian, kanë kaluar përmes kësaj pike strategjike, nëpër të cilën zakonisht kalon një e pesta e furnizimeve botërore me naftë dhe gaz natyror të lëngshëm, sipas të dhënave të agjencisë së gjurmimit detar MarineTraffic.

Ndërkohë, një cisternë e ngarkuar me naftë dhe produkte kimike, me flamur të Bahamasit, duket se po përpiqet të kalojë kanalin duke përdorur një rrugë më pranë anës iraniane të Ngushticës, tregojnë të dhënat e MarineTraffic.

Destinacioni i saj figuron të jetë qyteti-port Fujairah, në bregun lindor të Emirateve të Bashkuara Arabe.

Të dielën, Qendra e Përbashkët e Informacionit Detar (JMIC), e cila mbikëqyret nga Marina e SHBA-së, tha se “rruga jugore” përmes Ngushticës së Hormuzit, e cila ndjek vijën bregdetare të Omanit, mbetet e hapur për qarkullim në të dy drejtimet.

Por lëvizja mbetet e kufizuar pavarësisht këtij njoftimi dhe paralajmërimi i Iranit tashmë po shkakton pasoja në mbarë rajonin.

Katari u bëri thirrje pronarëve të mjeteve lundruese që më herët gjatë ditës “të pezullojnë përkohësisht lundrimin dhe të gjitha format e aktiviteteve detare”, përfshirë përdorimin e mjeteve rekreative, anijeve të peshkimit dhe motorëve të ujit, mes përshkallëzimit të fundit të luftimeve pranë kësaj rruge ujore.