Jhon Duran duket se është pranë transferimit te klubi portugez Benfica, duke qenë në prag të kalimit te klubi i katërt brenda vetëm 18 muajsh.

22-vjeçari raportohet se është në bisedime me gjigantin nga Lisbona, edhe pse vetëm në janar të vitit 2025 u transferua tek Al Nassr për plot 71 milionë funte.

Duran bëri emër pas transferimit nga Chicago Fire tek Aston Villa në janar të vitit 2023, ku shënoi 20 gola në 78 paraqitje nën drejtimin e Unai Emeryt.

Forma e tij tërhoqi interesimin e disa klubeve, përfshirë West Ham Unitedin, por ai zgjodhi të transferohej në Arabinë Saudite me një kontratë që besohet se i siguronte rreth 17 milionë funte në vit.

Megjithatë, pas vetëm tetë golave në 13 ndeshje me Al Nassrin, sulmuesi kolumbian vendosi të kalonte në huazim njëvjeçar te Fenerbahçe.

Te klubi turk ai realizoi vetëm pesë gola në 21 paraqitje, ndërsa huazimi i tij u ndërpre gjatë afatit kalimtar të dimrit, duke kaluar më pas te Zenit St. Petersburg.

Duran shënoi dy gola në nëntë ndeshje me klubin rus, përpara se huazimi i tij të përfundonte në fillim të kësaj vere.

Sipas gazetës portugeze “A Bola”, sulmuesi tani është në negociata për t’u transferuar te Benfica në formë huazimi për sezonin e ardhshëm, çka do ta bënte këtë klubin e shtatë në karrierën e tij profesionale, ndonëse është vetëm 22 vjeç.

Raporti shton se Benfica e ka ndjekur prej kohësh Duranin dhe ai u la përshtypje drejtuesve të klubit portugez kur u përball me ta si lojtar i Fenerbahçes në fazën “play-off” të Ligës së Kampionëve sezonin e kaluar.

Mario Branco, i cili ishte drejtor sportiv i Fenerbahçes kur u arrit marrëveshja për huazimin e Duranit, tashmë mban të njëjtin post te Benfica, gjë që mund ta lehtësojë ribashkimin mes tyre në ditët në vijim.

Po ashtu, raportohet se Duran është njoftuar se nuk bën më pjesë në planet e Al Nassrit dhe se drejtori ekzekutiv i klubit saudit i ka dhënë leje që të kërkojë një transferim gjatë kësaj vere.

Ish-sulmuesi i Aston Villës synon ta ringjallë karrierën e tij pasi mbeti jashtë listës përfundimtare të Kolumbisë për Kupën e Botës.

Edhe pse ishte përfshirë në listën paraprake, ai nuk u përzgjodh për turneun final.

Duran numëron tri gola në 17 paraqitje me Kombëtaren e Kolumbisë.

Ndërkohë, Benfica po rindërton skuadrën nën drejtimin e trajnerit të ri Marco Silva, pasi Jose Mourinho u rikthye te Real Madridi.

Klubi portugez ka transferuar tashmë Georgiy Sudakov nga Shakhtari, Jakub Kamińskin nga Kolni dhe Enzo Barrenechean nga Aston Villa me kontrata të përhershme, ndërsa Clément Lenglet i është bashkuar skuadrës në formë huazimi nga Barcelona.