E ardhmja e Vinicius Junior te Real Madridi është bërë e pasigurt pasi orë të tëra bisedimesh për një zgjatje të kontratës nuk kanë dhënë asnjë përparim. Negociatat midis futbollistit brazilian dhe klubit kanë vazhduar për gati një vit dhe kanë dalë në dritë detaje që zbulojnë dallime të konsiderueshme në pikëpamje dhe mund ta ndërlikojnë situatën.

Që nga fillimi i negociatave, Vini ka kërkuar një pagë vjetore prej 30 milionë eurosh dhe të drejta të plota për imazhin e tij, të cilat do të barazoheshin me të ardhurat e Kylian Mbappe. Real Madridi më parë i ofroi atij 22 milionë euro dhe 50 përqind të të drejtave të imazhit, të cilat braziliani 25-vjeçar nuk i pranoi, shkruan Index.hr, transmeton klankosova.tv.

Pas takimit të fundit, duket se klubi ka vendosur të caktojë kushtet përfundimtare. Bordi i Realit është i vetëdijshëm se interesi i Arsenalit nuk është vetëm një lajm mediatik, kështu që i ka kërkuar Viniciusit të marrë një vendim përfundimtar nëse do të nënshkruajë një kontratë të re apo do të marrë në konsideratë largimin. Mesazhi i klubit është i qartë: “Askush nuk është më i madh se Real Madridi”.

Oferta e re dhe e fundit e Real Madridit është 23 milionë euro në vit, 1 milion euro më shumë se ajo e mëparshmja, duke ruajtur 50 përqind të të drejtave të imazhit. Megjithatë, klubi nuk është i përgatitur të paguajë një bonus nënshkrimi, që ishte një nga kërkesat e Vinicius.