Jose Mourinho nuk u përmbajt në vlerësimin e tij për temperamentin e Madridit pas pengesës së tyre të parë të madhe të sezonit në La Liga.

Pavarësisht se dominuan pjesën më të madhe të lojës, “Los Blancos” u larguan nga Sevilla duarbosh, duke e lënë trajnerin e tyre të reflektojë mbi dallimet psikologjike mes dy grupeve të lojtarëve. Mourinho ishte veçanërisht zëshëm për mungesën e perceptuar të hileve të lojës nga skuadra e tij, duke i përshkruar ata si “të pastër” dhe “naivë” përballë një ekipi më të përvojshëm të Betisit që dinte saktësisht se si ta menaxhonte orën dhe emocionet e gjyqtarit gjatë gjithë nëntëdhjetë minutave.

Ai e elaboroi më tej kontrastin në stile, duke deklaruar: “Lojtarët e Betisit janë më të mençur se ata të Real Madridit në atë kuptim,” tha trajneri.

“Ata të Madridit janë naivë… Lojtarët e Betisit u përpoqën të ndikonin te gjyqtari, por lojtarët e Madridit, kur diçka meriton një karton të verdhë, ngrihen menjëherë përsëri në këmbë … Kur luan kundër ekipeve me këtë mentalitet, është një faktor i rëndësishëm”, tha ai.

Përderisa Mourinho e lavdëroi gjyqtarin sepse në përgjithësi e la lojën të rrjedhë, ai ishte thellësisht i pakënaqur me ndryshimin në mënyrën se si u trajtuan faullet dhe ndëshkimet. Ai vuri në dukje se Arda Guler u ndëshkua për një shkelje të vogël, ndërsa Betis i shpëtoi disa kartonëve të hershëm. Mourinho gjithashtu nxitoi të tallte teatralitetin e kundërshtarit, duke vërejtur një incident të caktuar pranë zonës së tij teknike. “Aji djaloshi që ishte i vdekur aty para bankinës sime… mendova se po vinte autoambulanca dhe në fund nuk pati asnjë autoambulancë. Në atë kuptim e thashë,” tha ai.

Pavarësisht rezultatit, Mourinho këmbënguli se ishte i kënaqur me performancën kolektive, edhe nëse rezultati nuk reflektonte superioritetin e tyre. “Nëse përfundon në barazim ne largohemi të frustruar, sepse kemi bërë më shumë; imagjinoni pra me humbje. Urime Betisit, i cili luajti për barazim dhe fitoi lotarinë,” shtoi ai.

Drama arriti kulmin në minutat e fundit në “La Cartuja” kur Kylian Mbappe iu dha një mundësi e artë për të barazuar nga pika e bardhë. Sidoqoftë, francezit iu prit goditja nga Alvaro Valles, gjë që çoi në thirrje të menjëhershme për përsëritje për shkak të hyrjes së mundshme të parakohshme nga mbrojtësi i Betisit, Marc Bartra. Pavarësisht protestave të dukshme nga bankina e Madridit, VAR-i nuk ndërhyri, duke e lënë Mourinhon të reflektojë mbi një natë ku fati dukej se e braktisi tërësisht skuadrën e tij të mbushur me superyje.

I pyetur për vendimet e caktuara të referimit, përfshirë penalltinë dhe një gol të anuluar të Carlos Espi, Mourinho mbeti i matur, por qartësisht i zhgënjyer nga mungesa e qartësisë. “Nuk i kam parë [episodet],” pranoi ai. “Nuk i kam parë në dhomat e zhveshjes, kështu që nuk mund të komentoj,” deklaroi Mourinho./GazetaExpress/