Stresi financiar afatgjatë nuk dëmton vetëm xhepin. Një studim i ri sugjeron se mund të lidhet edhe me plakjen e trurit.

Studiuesit e University College London analizuan të dhënat e 2,759 britanikëve, të ndjekur për dekada, dhe krahasuan gjendjen e tyre financiare me kujtesën, shpejtësinë e përpunimit të informacionit dhe shëndetin e trurit.

Rezultatet treguan se njerëzit që kishin përjetuar vështirësi financiare të vazhdueshme ose të ardhura të ulëta në periudha të ndryshme të jetës kishin rezultate më të dobëta në testet e kujtesës dhe përpunimit mendor rreth moshës 53 vjeç. Te një pjesë e pjesëmarrësve që iu nënshtruan skanimeve të trurit në moshën 69-71 vjeç, të ardhurat e ulëta të vazhdueshme u lidhën edhe me më shumë shenja të tkurrjes së trurit.

Studiuesit mendojnë se një rol mund të ketë stresi kronik dhe energjia mendore që harxhohet duke u shqetësuar vazhdimisht për faturat, borxhet dhe shpenzimet.