(Gjysma akull – gjysma borë.)

…

1.

Mesazhi politik i Donika Gërvallës me Ligjin për Byronë është i qartë:

“Haga ua mori lirinë.

Unë do t’ua marr pasurinë.’

Ajo le të gëzohet.

Është dukuri e njohur për shkencën të qeshësh kur të tjerët qajnë.

Por unë kërkoj… të gëzohet hapur.

Të thotë se e pranon vendimin e Hagës. Bile, se i duket pak.

Të mos trembet nga gëzimi.

…

2.

Kosova:

një fshat me dy popuj shqiptarë.

Njëri është shumë i mërzitur.

Tjetri është i gëzuar.

Tinëz.

Mërzia nuk i është sulur gëzimit.

Për sherr, gëzimi po gëzohet edhe më shumë.

Dhe, në mënyrë perfide, po e ngacmon mërzinë që të mërzitet edhe më shumë.

Qeveria Kurti,

si okupatore e Kosovës, e shikon nga dritarja mërzinë e njërit popull.

Pjesa tjetër e popullit është angazhuar t’i lëndojë të mërziturit nëpër rrjete sociale.

…

Për ilustrim:

Albulena Haxhiu iu tha të mërziturve:

“Ejani këtu t’ju ngushëllojë.”

– Keni dëgjuar ndonjëherë që ai që mban zi të shkojë vetë te ngushëlluesi?

As te Katarina e Madhe.

…

3.

Shqiptarët u dënuan dhe faji i tyre mbeti sekret.

Por kryeministri “veteran i luftës” u pa duke kërcyer hopa në stadium.

I gëzuar për një gol.

Le të shqyhet nga gëzimi.

Pasi lumturia kushton kaq lirë, mund të gëzohet edhe për fatin e zi të “bashkëluftëtarëve” të tij.

Por nuk është bon ton.

Nuk është mirësjellje.

Është kulturë politike serbe.

…

4.

Në hyrjen ku kam jetuar në veri të Mitrovicës, shumica kanë qenë serbë.

Është e kotë.

Në daç sillu mirë.

Në daç ndihmoju.

Në daç respektoji – në gjuhën e tyre.

Në daç, kur e pastron dyshemenë para derës tënde, pastroje edhe para derës së tyre.

Ata janë kundër teje.

Politikisht.

Jo domosdo personalisht.

Në momentin kur filluan bombardimet e NATO-s, të gjithë, pa përjashtim – gra e të rinj – u armatosën kundër nesh.

Hyrja u bë, kat më kat, repart ushtarak.

Kësi kulture politike serbe kam vërejtur edhe në Qeverinë Kurti.

Kot i voton.

Kot sillesh mirë.

Kot shkruan mirë.

Kot punon mirë.

Kot i respekton.

Ata e kanë marrë vendimin paraprak:

Ti nuk je pjesëtar i popullit të tyre.

…

Për shembull.

Unë e kam votuar njërën që tash është ministre.

Nga mëshira.

Sepse unë ua jap votën vetëm atyre që më ngjallin mëshirë.

E njëjta nuk ma ka parë veprën.

As shkrimet.

As votën.

Ka thënë:

“Po, por kam dëgjuar (më ka thënë dikush) se Kimi në një kafehane ka folur keq për mua.”

Tipike për këtë kulturë politike serbe: merret me thashethemet, jo me veprat e tua.

S’po them se e kanë keq.

Po them se e kanë srbski.

Kulturë dyshimi.

Paranoje.

Pabesie.

Dhe, kur lodhen nga të gjitha këto:

të vrasin me propagandë.

Nejse.

Ti mbijeton.

Patjetër

…

5.

Tani, pikërisht për këtë sado-organizatë, PDK-ja u bë muhtaxh.

Të bëhesh nevojli për dikë që të urren – është mallkim.

Por zori të çon te dera e hasmit.

E hasmi as nuk do t’u ndihmojë.

As nuk do të vërehet se nuk do.

…

PDK-ja ka sharruar në patriotizëm.

Patriotizmi të çon në luftë.

Jo në zgjidhjen e problemeve.

Problemet zgjidhen me mend.

Jo me zemër.

Jo me dashuri.

Le të jetë mendja edhe e armikut – veç le të jetë e zgjuar.

Për fat të keq, shqiptarët edhe problemet përpiqen t’i zgjidhin me të vetët.

Prandaj nuk i zgjidhin.

…

6.

Tani, gracka më e rrezikshme e dashurisë është ajo e Edi Ramës.

Vetëm Vlora Hyseni e tejkalon me absolutizëm dashuror.

Të dëshpëruarit që ende besojnë në dashuri.

(Lum ata.

Për mallkimin e bukur.)

Sipas Edi Ramës, Shtetet e Bashkuara, me Bidenin, e tradhtuan Hashim Thaçin.

Edi Rama përdor retorikë të vjetruar.

Ani pse ai e di se “besnikëria” dhe “tradhtia” i përkasin kodeve të vjetra të nderit, kur aleanca kuptohej si besë personale…

fjalorit të odave e të këngëve të kreshnikëve.

Tani, kur patriotizmi po derdhet rrugëve të humbura, Edi Rama ua gjeti të mërziturve edhe fajtorin:

Amerikën.

– As Vuçiçi s’ka ditur kaq zi.

…

7.

Në Kosovë ekziston një mur urrejtjeje.

Herë i heshtur.

Herë i pashpallur.

Si një Mur Berlini që nuk shihet në hartë.

Edhe po të duash ta rrëzosh, nuk mundesh.

Sepse nuk është prej betoni.

Është mur shpirtëror.

Në njërën anë: LDK-ja, VV-ja.

Në anën tjetër: të tjerët.

Dhe ne.

Muri nuk ka roje.

Secili e ruan nga ana e vet.

…

EPILOG

Tani, tingulli më i bukur është heshtja.

Jo dashuri.

– Mençuri.

Sepse dashuria të çon në tradhti.

Mençuria ta ruan lirinë.

…

P.S.

Padashje.

Më ra rruga pranë një ndërtese ku dikur punonte një ish-mik imi dhe ma bënte me dorë nga dritarja.

Ndërtesa ishte e braktisur. Dritaret kishin zënë perde prej balte.

M’u kujtua.

Padashje.

Duke menduar për ish-dashuritë, rrëshqita.

Rashë me shpinë, pjerrtas.

Dy gra para meje dhe një burrë prapa kujtuan se mbarova.

Bërtitën.

Britma e tyre m’u duk si përqafim.

Ishte përqafimi më i çuditshëm që kam përjetuar.

Sikur ta dinin sa fort më përqafuan me frikën e tyre.

Nuk u lëndova.

Rikujtova:

Mendja të rrëzon.

….

AUTOKRITIKË

Tradhtia

Haxhi Zekës i thanë se filani e kishte tradhtuar.

– Jo – u përgjigj. – Atij s’i kam bërë kurrë ndonjë të mirë.

Prandaj dhemb.

Armiku nuk të tradhton.

…

Hamza Kastrioti e tradhtoi dajën.

Burrin e Rozafës e tradhtuan vëllezërit.

Moisi Golemi e tradhtoi Skënderbeun.

Gjergj Stres Balsha e shiti kështjellën për 30 mijë dukatë.

Ali Pashën e tradhtuan djemtë e tij.

Sulejmani i Madhërishëm e vrau të birin nga frika se po e tradhtonte.

Vlora Hyseni e tradhtoi Shqipërinë – për një mashkull.

Joe Biden e tradhtoi Hashim Thaçin.

(Nuk dihet arsyeja.)

Edi Rama nuk ia fali.

Deri në tradhtinë e radhës.

– Unë e kam tradhtuar veten.

…