Presidenti rus Vladimir Putin është në panik ndërsa parashikon një ndryshim në përbërjen e Kongresit amerikan.

Sipas kongresmenit demokrat George Whitesides, ai dhe presidenti Donald Trump po përpiqen ta detyrojnë Ukrainën të bëjë lëshime të pafavorshme, përpara se Kongresi i sapozgjedhur të fillojë punimet në janar.

Ai e shprehu këtë në një artikull opinionist për “ The Hill” të hënën, raporton Ukrinform, përcjell Telegrafi.

Sipas kongresmenit, Trump dhe Putin e kuptojnë se rezultatet e zgjedhjeve të ndërmjetme të 3 nëntorit mund t’ia heqin Shtëpisë së Bardhë ndikimin që ka aktualisht mbi politikën ndaj Ukrainës.

“Duke e ditur se ndikimi i tyre politik po shkon drejt fundit, Trump dhe Putin po nxitojnë ta detyrojnë Ukrainën të pranojë një marrëveshje të keqe, para se në janar të vijë një Kongres i ri, pro-Ukrainës, që mund t’i ndalojë ata,” shprehet Whitesides.

Ai e lidh presionin e shtuar ndaj Kievit me dëshirën e Moskës për të mbrojtur infrastrukturën e saj energjetike nga sulmet ukrainase me rreze të gjatë veprimi.

Whitesides kujton se më 9 tetor, Trump arriti një marrëveshje me Putinin për të rikthyer në tregun amerikan dhe atë global karburantin rus (naftën) që ishte nën sanksione, duke kërkuar njëkohësisht që Ukraina të ndalojë sulmet me dronë ndaj rafinerive ruse të naftës.

Sipas tij, kjo dëshmon efektivitetin e fushatës së Ukrainës kundër industrisë ruse të përpunimit të naftës dhe problemet që ajo i ka shkaktuar Kremlinit.

“Putini nuk është në gjendje t’i ndalojë dronët me sistemet e tij të mbrojtjes ajrore – dronë që kanë arritur madje deri në Moskë. Kështu, ai ka angazhuar presidentin amerikan që të shërbejë si mburojë për sektorin energjetik rus, duke i siguruar Kremlinit, në mënyrë të njëanshme, një burim të ri të ardhurash në mes të luftës”, tha kongresmeni.

Sipas Whitesides, administrata ka kaluar nga kërcënimet te veprimet konkrete: ajo ka dështuar të paralajmërojë Ukrainën për raketat balistike ruse dhe i ka kërkuar Pentagonit të vendosë kufizime shpejtësie në terminalet e komunikimit satelitor ushtarak “Starshield”.

Kongresmeni përmend gjithashtu përpjekjet për të ushtruar presion mbi vendet evropiane që ato t’i kalojnë miliarda dollarë nga asetet ruse të ngrira nën kontrollin e Uashingtonit – një tjetër formë presioni, që pretendohet se shërben për të rinisur negociatat e paqes.

Ai beson se një fitore e Demokratëve në zgjedhjet për Dhomën e Përfaqësuesve, e aq më tepër në të dyja dhomat e Kongresit, mund ta ndryshojë situatën.

Legjislatura e re do të kishte mundësinë që shkëmbimin e informacioneve të inteligjencës me Ukrainën ta sanksiononte me ligj, të siguronte qasje të përhershme në “Starshield”, të miratonte ndihmë ushtarake shumëvjeçare dhe të ruante asetet sovrane ruse që janë ngrirë.

Kongresmeni theksoi gjithashtu se një grup senatorësh nga të dyja partitë, përfshirë republikanët Mitch McConnell dhe John Cornyn, tashmë po i kërkojnë Trumpit ta anulojë marrëveshjen që ka të bëjë me karburantin dizel rus.

Whitesides e lidh nxitimin e Kremlinit me problemet ekonomike të Rusisë, duke përfshirë normat e larta të interesit dhe mungesën e theksuar të fuqisë punëtore.

Sipas tij, Putini dëshiron ta dobësojë Ukrainën përpara se rezultatet e zgjedhjeve në SHBA të kufizojnë mundësinë e Trumpit për të ndikuar në situatë.

Megjithatë, “ukrainasit nuk do ta sakrifikojnë mbijetesën e tyre vetëm për t’i shpëtuar Trumpin dhe Putinin nga agjendat e tyre përkatëse politike”, theksoi kongresmeni.

Ai u bëri thirrje Kievit dhe aleatëve të tij evropianë që të qëndrojnë të palëkundur deri në fund të vitit, të vazhdojnë t’i kundërvihen agresionit rus dhe të parandalojnë zhbllokimin e aseteve ruse.

Zgjedhjet e mesmandatit për Kongresin e SHBA-së do të përfundojnë të martën, më 3 nëntor.

Amerikanët do të zgjedhin të 435 anëtarët e Dhomës së Përfaqësuesve dhe 35 senatorë, si dhe guvernatorë në një sërë shtetesh.